Asturies vota esti 28-A los sos siete representantes nel Congresu y cuatro senadores

Esti domingu, 28 d’abril, celébrense eleiciones estatales anticipaes depués de que’l presidente Pedro Sánchez nun consiguiera sacar alantre los sos presupuestos. Asturies escueye ente 12 candidatures a siete representantes al Congresu, ún menos que nel 2016, y ente 11 a cuatro senadores de los seis que-y correspuenden al país.

Tres una campaña eleutoral nel que les problemátiques del país quedaron fuera, centrándose los discursos de la mayor parte de los partíos con representación en Catalunya, los hipotéticos pautos y la posible entrada nel Congresu de la estrema derecha, asturianes y asturianos tán llamaos a escoyer a los sos representantes en Madrid. Los colexos eleutorales van abrir les sos puertes a les 9 hores, siendo la hora de pieslle les 20 hores.

La documentación necesaria pa exercer el derechu al votu son el DNI, el pasaporte o’l permisu de conducir. 974.482 persones tán llamaes a les urnes n’Asturies, de les que 117.570 residen fuera del Estáu.

Les candidatures al Congresu

Namái dos formaciones asturianes d’ente les 12 candidatures acuden coles sos sigles a estes eleiciones. Son Foro, qu’acude en coalición col PP con Isidro Martínez Oblanca como númberu 2 –la cabeza de llista ye la popular Paloma Gázquez–, y Andecha Astur, que presenta a Llucía Fernández Marqués.

 El partíu nel Gobiernu, el PSOE, repite con Adriana Lastra. Mentes, los otros dos partíos con representación xunto colos socialistes y PP-Foro acuden a estes eleiciones con Sofía Fernández Castañón (Xuníes Podemos), que tamién fora candidata nel 2015 y nel 2016, y Ignacio Lastra (Ciudadanos-Partido de la Ciudadanía).

El restu de formaciones que participen el 28-A son el Partido Animalista Contra el Maltrato Animal (PACMA), con Claudia Suárez Martínez; Partido Comunista de los Trabajadores de España (PCTE), con Raúl Martínez Turrero; Por un Mundo más Justo (PUM+J), con Alberto Bueno; Actúa, con Ángel José López Díaz; Recortes Cero-Grupo Verde, con María de las Mercedes de la Torre; y VOX, con José María Figaredo.

Cuatro de seis senadores

Asturies escueye tamién cuatro de los seis senadores que-y correspuende –los otros dos restantes escuéyelos la Xunta Xeneral–. Los candidatos de los partíos son José Ramón García Cañal (PP-FORO, cola forista María del Camino Gutiérrez Gutiérrez como númberu 3 de la llista), Francisco Antonio Blanco (PSOE), María Mar García González (Xuníes Podemos), Nicanor García Fernández (Ciudadanos-Partido de la Ciudadanía), Arturu Xosé Bermeyu (Andecha Astur), Walter Sánchez Suárez (PACMA), Saúl Fernández Garrote (PCTE), Jesús Fernando Rodríguez Roiz (Partido Humanista), Agustín Garrido (PUM+J), Eduardo Madroñal (Recortes Cero-Grupo Verde) y Juan Fernández Baños (VOX).