Felpeyu recibió'l pegollu de la Xunta en nome de la música n'asturianu

"Los miembros del grupu musical ""Felpeyu"" recoyeron ayeri nun emocionante actu en Xixón el pegollu del premiu ""Andrés Solar"" que tolos años entrega la organización de defensa del asturianu Xunta Pola Defensa de la Llingua Asturiana en reconocimientu a la persona o entidá que más fexere a favor del asturianu a lo llargo del añu. Yolanda González y el periodista Inaciu Varillas presentaron l'actu, nel que'l públicu enllenó'l salón d'actos del Antiguu Institutu Xovellanos de Xixón.

Los aplausos del públicu felicitaron a Xuan Nel Expósito, Diego Pangua, Ruma Barbero y Lisardo Prieto cuando recibieron el premiu de manes de Lali Solar, hermana del desapaecíu escritor Andrés Solar, al que faen alcordanza estos premios. Nes sos palabres d'agradecimientu en nome de tol grupu, Ruma Barbero ofreció'l pegollu a ""tola xente de la música asturiana"" y especialmente a les figures d'Ígor Medio y Carlos Redondo, músicos de Felpeyu que perdieron la vida nun accidente de tráficu l'añu pasáu.

Como ye vezu na entrega de los premios, a la hora d'entregase' la parte negativa del mesmu, el ""madreñazu"" a la persona que más dañu fexo al asturianu, el galardonáu nun fexo actu de presencia. El presidente asturianu Vicente Álvarez Areces foi merecedor de la madreña 2007 ""pola so trayectoria llamentable de despreciu y agresión constante al nuestru patrimoniu llingüísticu y a los derechos de los falantes d'asturianu"" acordies col acta del xuráu.

El miembru de la Xunta Pola Defensa de la Llingua Asturiana Lluis Miguel Orviz fexo'l tradicional repasu al añu que pasó dende'l puntu de vista de la organización. Orviz definió'l 2006 como ""un añu de medria pa la Xunta"" en medio d'un panorama ""predemocráticu pa los falantes d'asturianu"", en referencia a los procesos xudicialers contra la ""pita"" de la Xunta o la sentencia xudicial contra la presentación d'una tesis doctoral n'asturianu. Los diez primeros años d'existencia de la organización xuvenil de la Xunta, la Xunta Moza de la que'l mesmu Orviz foi ún de los fundadores, centraron la parte positiva del discursu, nel que se fexo un llamáu al reconocimientu de la oficialidá como solución a un problema ""pal que nun valen atayos nin posiciones intermedies"". Ello foi que'l discursu institucional de la Xunta remató con palabres mui crítiques pa coles polítiques de normalización del asturianu de los últimos años, que se calificaron de ""exerciciu de distracción que nun supunxo un esfuerzu planificáu pa normalizar la llingua"". Orviz xustificó por ello'l madreñazu a Areces, al qu'acusó de ""pretender quel'asturianu nun pueda ser una lingua moderna y usada por tolos asturianos"".

Un conciertu del cantautor de Cangas del Narcea Pedru Pereira punxo'l piesllu al actu, tres del que se celebró una espicha nuna sidrería de Xixón."