La XL Selmana de les Lletres Asturianes echa a andar col Alba de les Lletres Asturianes

Llorgozana va acoyer esti vienres, per segundu añu, l’Alba de les Lletres Asturianes, actu d’aniciu de la XL Selmana de les Lletres Asturianes. Esta edición ta dedicada a la música asturiana de los 40 años postreros, gran ferramienta normalizadora, y tien programaos actos en diez conceyos del país hasta’l 9 de mayu.

La poesía va protagonizar l’Alba de les Lletres Asturianes, a les 7 hores, na escuela de la parroquia onde nació Antón de Marirreguera. L’activididá va consistir nuna llectura de poemes, con participación del alumnáu, y un taller sobre la figura del escritor.

Yá de tarde, a les 20 hores, el Teatru Nuevu de La Felguera va ser sede de la gala del del XI Premiu al Meyor Cantar, que s’incorpora per primer vegada dientro de la programación de la Selmana de les Lletres. Los finalistes son Xaime Martínez (‘Discursu de Belarmino Tomás ente los soldaos mentes camina sobre les agües del ríu Nalón’), Lafu y Rebeca (‘Les sombres sobre la yerba’), Los Berrones (‘¿Esto pa qué val?’) y la Banda de Gaitas El Trasno (‘Oldenburg’).

El sábadu, a les 20 hores, una carpa instalada na Plaza Nueva de Ribeseya va acoyer un conciertu del grupu folk Corquiéu. Les actividaes centraes na música siguen el llunes, a les 18 hores nel Auditoriu de La Pola Siero, col actu de presentación del CD ‘El mio cantar’ y un conciertu colos cantares ganadores del premiu escolar del mesmu nome, nel que tamién van participar Corquiéu, Guaja D, Llibre, L-R y Skontra interpretando los temes en direuto.

La Xunta Xeneral va acoyer el martes al meudía la yá tradicional llectura pública institucional de testos n'asturianu y gallego-asturiano. Esa mesma tarde, a les 19.30 hores, va celebrase na capiella de los Dolores, en collaboración cola Fundación Aula de les Metáfores de Grau, la entrega de los diplomes del VI Premiu de Poesía que se convoca pal alumnáu d'esi conceyu, amás de l'actuación de Toli Morilla.

Discu conmemorativu

El xueves 2 de mayu va presentase nel Muséu de Belles Artes d'Uviéu'l discu conmemorativu de la XL Selmana de les Lletres Asturianes, que lleva’l nome de ‘40 años al son de la nuestra música/40 anos al son da nosa música’, escoyeta de 40 temes que percuerren la historia de la música cantada nestes dos llingües. Ésti va regalase’l vienres, Día del Llibru Asturianu, en 56 puntos de distribución d'Asturies al mercar llibros y discos n'asturianu o en gallego-asturiano, que cuenten con un descuentu del 10 por cientu nesta xornada.

La Feria del Llibru y Discu n’asturianu cambia d’ubicación depués de seis ediciones, dexando Avilés por Uviéu, y reduz el so llargor de cuatro a dos díes. Entamada pola Asociación de Llibreríes del Principáu d'Asturies, va instalase na Plaza de Trascorrales y va abrir les sos puertes el sábadu (12 a 22 hores) y el domingu (11 a 19 hores), calteniendo les presentaciones de llibros, les sesiones de cuentacuentos, los conciertos y alcuentros lliterarios.

La postrera de les actividaes específicamente dedicada a la música ye'l conciertu d'ópera n'asturianu que'l claustru del Muséu Arqueolóxicu d'Asturies va acoyer el domingu 5 de mayu a les 12.30 hores. El tenor Pedro José González, el barítonu Juan Salvador Trupia, el pianista Mario Bernardo Fernández y el Coru de la Universidá d'Uviéu van interpretar una escoyeta de pieces adaptaes al asturianu pol músicu y escritor Carlos Rubiera.

Otra actividá programada ye la cuarta edición de Entaína a Escribir, concursu de microrrelatos improvisaos n'asturianu pa xente mozo que se convoca en collaboración col Institutu Asturianu de la Muyer y Polítiques de Mocedá. Ésta va celebrase’l martes 7 a les 19.30 hores na Sala Borrón d'Uviéu.

Actividaes pa escolinos

Nel programa de la Selmana hai tamién actividaes teatrales pa los más pequeños, como'l martes viniente en Corvera, onde la compañía Higiénico Papel va representar la obra ‘Hansel y Gretel’, ganadora del II Premiu Nel Amaro de Teatru Profesional en Llingua Asturiana o Gallego-asturiano. El Teatru de Llaboral de Xixón va acoyer la representación de les obres ‘De qué color ye’l sol’, de Kamante Teatru (miércoles 8), y ‘Nunca nun se sabe’, d' Higiénico Papel (xueves 9).

Otra manera, nel Teatru Armando Palacio Valdés d'Avilés van entregase los premios del VI Certame de Teatru Escolar y van representase dalgunes de les obres ganadores el xueves 2 a les 18 hores. Mentes, el vienres, 3 de mayu, el Colexu Públicu Lorenzo Novo Mier d'Uviéu va ser l'escenariu al meudía del actu escolar institucional de celebración de la Selmana de Les Lletres cola entrega de los premios de los certámenes artísticos y lliterarios.

Occidente

El gallego-asturianu va tar presente na Semana das Lletras Asturianas nel Auditoriu de Tapia’l sábadu 4 de mayu, a les 19 hores, col Homenaxe ás nosas lletras. Nesta ocasión el protagonista ye’l grupu de rock Bacotexo, que presenta en conciertu’l so últimu discu, ‘Mar’.

XL Día de les Lletres Asturianes

El vienres 4, XL Día de les Lletres Asturianes, fuera de les actividaes programaes pola Conseyería d’Educación y Cultura, l’Academia de la Llingua Asturiana celebra una xunta estraordinaria nel Teatru Campoamor, onde la institución va acoyer como académicos al escritor Pablo Texón y a Alberto Fernández Costales, profesor del Área de Didáutica de la Llingua y la Lliteratura dientro del Departamentu de Ciencies de la Educación de la Universidá d’Uviéu y coordinador del Programa de Doctoráu n’Educación y Psicoloxía. Una hora enantes, a les 19.30 hores, la Xunta pola Defensa de la Llingua Asturiana va tornar a salir a la cai, como ye vezu nesta xornada, pa reclamar la oficialidá del idioma.