La Xunta Eleutoral valida les papeletes n'asturianu pero nun garantiza la so distribución el 28-A

Andecha Astur, formación que les presentó énte l'organismu, asegura qu'esta situación ye una "espresión más de l'anormalidá democrática que se vive n'Asturies".

La Xunta Eleutoral valida les papeletes n'asturianu del partíu nacionalista, tal como afita la sentencia del Tribunal Costitucional al respeuto, anque nun garantiza la so distribución en tolos colexos eleutorales nes eleiciones estatales del día 28. Asocede, poro, al igual que nes Nacionales y llocales del 2015, última vegada na qu'Andecha Astur se presentó a una cita eleutoral, cuando llegó a impugnar les eleiciones pola ausencia de les sos papeletes en polo menos cien centros de votu.

"Los apoderaos de los partíos mayoritarios (PP y PSOE) retiraren en conceyos como Xixón toles papeletes eleutorales d’Andecha Astur, énte’l silenciu cómpliz d’interventores y apoderaos d’esa izquierda sucursalista insolidaria que nun gutió nin cuandu se produxeron los incidentes, nin cuandu los apoderaos ya interventores d’Andecha Astur paralizaron les votaciones y punxeron les correspuendientes reclamaciones", critiquen los nacionalistes. En dalgunos casos éstes nun se repusieron hasta cerca de les 14 hores.

"Una vuelta más, sabiendo a los que mos arriesgamos y por pura coherencia, Andecha Astur ufrirá a los asturianos y asturianes la posibilidá de votar na so llingua precisamente a la única organización asturiana que se presenta a estes eleiciones", apunten.