Viejo pon una conferencia sobre Menéndez Pidal y l'asturianu

Dientro del ciclu 'Menéndez Pidal y Asturias' qu'entama Juan Carlos Villaverde nel RIDEA al rodiu la esposición de la Universidá d'Uviéu.

Xulio Viejo pon esta tarde la segunda de les trés conferencies sobre la figura de Ramón Menéndez Pidal y la so rellación con Asturies. El profesor de la Universidá d'Uviéu va falar nel salón d'actos del Real Instituto de Estudios Asturianos (RIDEA) de 'Menéndez Pidal y l’asturianu: ciencia y discursu sobre una llingua d’España'.

L'eventu, que va contar cola asistencia de Fernando Padilla, direutor xeneral de Planificación Llingüística y Normalización, va comenzar a les 19.30 hores, con entrada llibre. Esti ciclu de conferencies complementen l'amuesa 'Menéndez Pidal y Asturias', allugada na sala d'esposiciones del Edificiu Históricu de la Universidá d'Uviéu hasta'l día 28, con semeyes del filólogu nel país y dellos materiales, asina como documentos de los sos trabayos sobre'l dominiu llingüísticu asturlleonés.

Romances y dances

La tercera y cabera charra va tener llugar el 8 de mayu a la mesma hora, centrada en 'Menéndez Pidal y Asturias: los romances y las danzas', y va encargase d'ella Yolanda Cerra, de l'Asociación Asturiana de Antropología y Patrimonio Etnológico'. Enantes, el pasáu día 27, Jesús Antonio Cid, de la Universidad Complutense de Madrid y presidente de la Fundación Ramón Menéndez Pidal, que collabora nel ciclu xunto col RIDEA, trató sobre 'Ramón Menéndez Pidal y el romancero de Asturias'.

Na semeya, parte de la esposición 'Menéndez Pidal y Asturias'.