La sociedá asturiana sal una vegada más a la cai pa reclamar la igualdá de derechos llingüísticos

‘L’asturianu llingua oficial ¡agora! y ‘El gallego-asturiano llingua oficial ¡agora!’ son los dos lemes de la manifestación que va percorrer Xixón esti sábadu en demanda de la igualdá de los derechos llingüísticos de los falantes de dambos idiomes colos de castellanu. Va salir de L’Humedal a les 18 hores en direición a El Náutico.

“La oficialidá ye'l reconocimientu llegal del derechu que tien cualquier persona a usar llibremente la llingua propia d'un territoriu. La oficialidá ye un avance democráticu porque amplía derechos y llibertaes ciudadanes”, apunten dende la organización convocante, la Xunta pola Defensa de la Llingua Asturiana (XDLA), que recuerda que “n'Asturies tenemos dos llingües propies, l'asturianu y el gallego-asturiano, y los sos falantes nun tienen reconocíu llegalmente esi derechu. Si les nuestres llingües son como les demás llingües del Estáu, ¿por qué los sos falantes tienen menos derechos que los falantes d'otres comunidaes? Queremos el mesmu tratu institucional y el mesmu réxime de protección que tienen les demás llingües del Estáu”.

Por ello, llama a la ciudadanía a participar na marcha que va percorrer mañana la distancia esistente ente L’Humedal y El Náutico, onde la presentadora Sonia Fidalgo y l'actor Antonio Lobato van encargase de lleer el manifiestu final. Darréu, Marisa Valle Roso y el DJ Fruela 757 van encargase de poner el ramu a la xornada reivindicativa con un miniconciertu.

Tolos sindicatos mayoritarios, amás d'una parte importante de los partíos políticos y del texíu asociativo asturiano, sofiten la manifestación, que promete algamar cifres asemeyaes a les rexistraes l’añu pasáu n’Uviéu’l 21 d’abril, con una participación de cerca de 30.000 persones. A pesar de l’anuncia d’agua, l’Axencia Estatal de Meteoroloxía (Aemet) nun pronostica lluvia en Xixón pa la hora de la manifestación.

“Hai que reformar l'Estatutu d'Autonomía p'aprobar la oficialidá y depués, con una Llei de Normalización, siguir un procesu adaptáu a la situación asturiana. Na llexislatura próxima, na Xunta Xeneral hai que poner remediu a un déficit democráticu que lleva demasiaes décades pendiente”, afirma la XDLA.

Semeya: Manifestación del 2018