Polémica pola identidá de la cultura tradicional del Navia-Eo

"Un grupu d'asociaciones del Navia-Eo encabezaes pol colectivu de defensa del gallego-asturianu ""Xeira"" constituyeron esta selmana la ""Plataforma Cultural Eonaviega"" que se manifestó públicamente presentando un documentu críticu con una de les iniciatives culturales d'actualidá pel occidente asturianu, como ye'l proyectu sobre cultura tradicional del Occidente d'Asturies qu'empobina la ""Federación de Asociaciones del Occidente de Asturias Navia-Eo"".

La Plataforma afirma que la documentación que la Federación ta presentando énte los conceyos del Navia-Eo cae ""nuna perspectiva aisllacionista de la cultura del occidente asturianu"" y que fai ""afirmaciones d'escasa consistencia y poco axustaes a la realidá cultural asturiana"", asegurando que los promotores del proyectu de la Fedración son los mesmos que defendieron la candidatura gallego-portuguesa al Patrimoniu inmaterial de la Unesco. Nel so documentu, que va presentase a tolos conceyos del Navia-Eo onde la Federación yá presentó la so propuesta, la Plataforma acusa a la Federación de ""partir de la falsa premisa de que la cultura del Navia - Eo estrémase de la del restu d'Asturies"" dalgo que ""xustificaría la existencia d'un centru qu'estudiare específicamente la nuestra cultura tradicional"". Contra esta idea, la Plataforma asegura que la Ría del Navia nun ye en realidá nenguna frontera cultural y que, contra la perspectiva ""aisllacionista"" de la propuesta que venceya tola comarca del Navia-Eo al ámbitu de la cultura gallega, ye preciso facer una visión más integradora de la cultura del Navia-Eo cola del restu d'Asturies, en cuantes que nun pue esplicase la una ensin la otra.

La plataforma ve tamién de manera negativa la propuesta de la Federación de facer un diseñu de centru cultural pal Navia-Eo xestionáu por una entidá particular pero pagu con fondos públicos, dalgo que llendaría la investigación ""a un grupu definíu d'especialistes"". La llectura descalificativa qu'asegura la Plataforma que se fai nel documentu de la Federación de bien d'estudios sobre'l Navia-Eo tamién se conseña nel documentu, que remata con un llargu anexu en que s'esplica la visión de la Plataforma sobre la continuidá d'elementos culturales dientro del Navia-Eo y fuera d'esta comarca. Asina, mientres la Federación fala del ""Navia - Eo"" como un llugar de característiques propies y mui particulares que lu estremen claramente del restu del Principáu"" y víctima d'un ""Aislamientu secular"", el anexu calfica de ""tópicu"" esta idea y denuncia como un ""tópicu interesáu"" la ""influencia de la cultura gallega"" na zona, llamentando que la visión que se da nel documentu de la Federación sobre la cuestión de la llingua nun cuente cola perspectiva de los mesmos falantes, que ""conocen la distancia que media ente ser falante de gallego - asturianu y ser falante de gallegu"".

La ""Plataforma Cultural Eonaviega"" encabézala l'asociación cultural de defensa del gallego-asturianu Xeira. Hasta agora, amás de Xeira, formen parte de la mesma les Bandes de Gaites ""La Reina del Truébano"" de Navia y la Marinotapiega de Tapia, l'Asociación de Bolos de Lloza de Cuaña, el Grupu de Piragüísmu Onda Brava de Pezós, l'asociación cultural El Cabazo de El Franco, l'asociación cultural Mezá de Bual y la Fundación Cultural Amigos de la Historia de Veiga (Tapia) anque la plataforma sigue abierta a la participación de más colectivos.

Asturies.com apurre los documentos de la Federación de Asociaciones del Occidente de Asturias Navia-Eo y de la Plataforma Cultural Eonaviega"