La Plataforma pola Defensa de la Térmica d'Avilés celebra una manifestación de protesta

"La plataforma ""'Salvemos la Térmica"" convoca esti xueves 18 de xineru una concentración en defensa de l'antigua central térmica d'Ensidesa n'Avilés, pa la que pide que se-y dea un usu cultural salvándola del derribu. La plataforma convocante, na que participen dende asociaciones de vecinos a partíos políticos pasando per grupos ecoloxistes, quier espresar énte les autoridaes y poderes particulares del conceyu ""la voluntá de los avilesinos por caltener el patrimoniu industrial local"". La concentración ta prevista pa les 20:00 hores na plaza Campusagráu d'Avilés, y con ella los manifestantes quieren demostrá-yos a los dirixentes políticos que ""la opinión del pueblu estrémase de la que los que tienen el gobiernu nel so nome"".

La manifestación convocóse en conociéndose'l vienres de la selmana pasada qu'entamaren los llabores definitivos de demolición de l'antigua central térmica d'Ensidesa - Avilés, que la sociedá Infoinvest quier terminar bien llueu pa disponer del suelu qu'ocupa l'edificiu y amestalu al polígonu industrial d'Avilés. La maquinaria pesao entamó esi día 12 a tirar muries y tarazar los sistemes de cañeríes de la central de 1950, qu'una plataforma cívica pide que nun se derribe y que se reconvierta pa usos culturales, como prometiere nel so día la Conseyera de Cultura. Dende la plataforma consideren qu'entovía hai tiempu a salvar el monumentu, en cuantes que los edificios baltaos hasta agora dientro del antiguu complexu industrial nun son los de mayor valor históricu y arquitectónicu que se pide que se caltengan."