Entama un grupu de trabayu pa que la Unesco reconoza los caminos de Compostela que pasen per Asturies

"Les comunidaes autónomes d'Asturies, Galicia, Cantabria y País Vascu entamaron ayeri, dientro del grupu de trabayu del Conseyu Xacobéu, la preparación d'una propuesta de candidatura de dos víes del Camín de Compostela que pasen pel norte de la península pa ser Patrimoniu de la Humanidá.

El director xeneral de Promoción Cultural y Polítca Llingüística d'Asturies, Carlos Madera foi ún de los participantes nel alcuentru d'esti Grupu de Trabayu, que quier potenciar el pasu del camín medieval de pelegrinaxe peles víes primitiva y de la costa, ello dempués de que, en xunu del 2006 el Conseyu de Patrimoniu Históricu Español aceptare formalmente la presentación énte la UNESCO del proyectu. La vía ""francesa"" del Camín yá llogró esti reconocimientu nel añu 1993, ampliándose'l llistáu nel 1998 coles cuatro víes principales que trescurren per Francia. Daquella quedaren escluyíes les víes más antigües pa llegar a Compostela, casu del camín primeru que pasa per Uviéu y atraviesa'l suroccidente asturianu entrando en Galicia per Lugo o'l camín de la costa, que va apegada a la oriella del mar dende Euskadi hasta entrar en Galicia.

El Grupu de Trabayu qu'echó a andar ayeri tien por oxetivu coordinar la realización del espediente de la candidatura al Patrimoniu Mundial de la Unesco, llevando alantre funciones de coordinación de los sistemes de xestión de cada comunidá autónoma, y mirando pol caltenimientu del mesmu camín y del patrimoniu venceyáu al mesmu."