La Fundación de la Sidra da-y el premiu del 2006 al Festival Intercélticu de Lorient

"La Fundación de la Sidra dio a conocer ayeri que'l ganador premiu qu'otorga añalmente esta entidá ye'l Festival Intercélticu de Lorient, que foi merecedor del reconocimientu pol so papel como elementu de promoción de la sidra nel Arcu Atlánticu, onde compite cola cerveza, y pol respetu de les tradiciones que representa'l festival. El premiu, dotáu con 6.000 euros y una escultura diseñada pol artista Pablo Maojo, va entregase en Colunga, nun actu que de momentu nun tien fecha acutada pero que va ser ente mediaos de febreru y mediaos de marzu.

Dase la circunstancia de que la candidatura del Festival al premiu la presentare Lisardo Lombardía, que lo fexo en calidá de presidente de la Fundación Belenos. L'alcalde de Nava, Claudio Escobio, esplicó que'l fechu de que Lombardía sía agora director del Festival de Lorient ye ""pura coincidencia"" en cuantes que la propuesta yá la fexere tiempu enantes del so nomamientu al frente del certame bretón.

La Fundación de la Sidra, na que tan presentes los principales conceyos d'Asturies, les Conseyeríes de Mediu Rural y Cultura y l'Asociación d'Hosteleros xunto cola Asociación de la Sidra, lleva entregando dende l'añu 2001 esti premiu dotáu con 6.000 euros y una obra del escultor maliayés Pablo Maojo que reconoz el llabor de los industriales, artesanos, divulgadores y estudiosos que faen pol mundu de la sidra. Ente les iniciatives reconocíes por esti premiu hailes asturianes como la de la Carpintería Terán pa recuperar toneles de castañu y estranxeres, como ye'l casu de la casa francesa ""Ferme de l'Hermitière"" productora de mazana, sidra y otros derivaos en Normandía. Nel 2005, el premiu foi pal llagareru inglés John Thatcher, con 40 años d'esperiencia al frente d'un llagar fundáu a primeros del sieglu XX."