Rafael Palacios píde-y al Gobiernu español qu’apierte sobre Israel "pa llograr una paz basada nos derechos humanos"

"El director de l'Axencia Asturiana de Cooperación al Desarrollu, Rafael Palacios, presentó esta mañana'l llibru-DVD ""Internacionales en Palestina. Resistencia non violenta contra la ocupación militar n'Israel"". Con motivu del actu, el responsable asturianu de cooperación esterior pidió-y al Gobiernu español ""qu'apierte sobre Israel pa llograr una paz con xusticia basada nel derechu Internacional y nos derechos humanos"".

Palacios esplicó que los documentales inxertos nel DVD, ""Nablus, la ciudá pantasma"" obra d'Alberto Arce, y ""Internacionales en Palestina"" de María María Moreno, tienen como oxetivu ""sensibilizar a los asturianos del movimientu pacifista que lleven alantre en Palestina xente d'estremaos países"" y el valor del ""mecanismu de llucha non violenta"". La edición del DVD ye de 1000 exemplares qu'incluyen semeyes, diariu de rodaxe y los dos documentales.

Palacios afirmó que la presencia de civiles internacionales en Palestina val pa ""denunciar les violaciones de los derechos humanos que tienen llugar nos territorios ocupaos"" y denunció la represión que se fai contra estos resistentes non violentos por parte del exércitu d'Israel.

El director de l'Axencia Asturiana de Cooperación tamién comentó que s'escoyó la fecha de güei pa presentar el material por ser un 17 de xineru'l día en qu'entamaron les rellaciones diplomátiques ente España y Israel. Con esti motivu, Palacios pidió que mientres Israel siga llevantando la muria nos territorios ocupaos de Palestina, el Gobierno español ""cese los alcuerdos y intercambios militares con Israel y que los estaos miembros de la unión europea y que'l Bancu Mundial dexe d'apurrir fondos pa la construcción de túneles que sofiten la situación creada pola muria"". Palacios denunció igualmente'l ""apresamientu y secuestru"" de parte del gobiernu palestín por parte d'Israel."