“El discu ye un repás de lo que facemos normalmente en direuto”, apunta Miguel Rodríguez Monteavaro

Caldo y Os Rabizos ta acabante de grabar el so primer discu, ‘A música tradicional del Eo-Navia’, “un repás de lo que facemos normalmente en direuto”, y protagoniza una cuestación popular na rede que ta siendo un ésitu. En cuatro díes yá cumplió'l 95 por cientu del so oxetivu y anuncia recompenses y sorpreses nueves.

“Lo cierto ye que tenemos bonos amigos”, bromia Miguel Rodríguez Monteavaro, que reconoz tar encantáu “con tan bona aceptación”. 3.500 euros yera la meta marcada y, nel momentu de redautar esta noticia, yá axuntaren 3.359.

“Cuando algamemos esa cantidá, que podría ser esta mesma nueche, vamos siguir col crowfunding ufriendo delles sorpreses nueves”, avanza’l redobrante de la banda, que cuenta con asoleyar el discu cuando’l fine la cuestación, que tendrá 40 díes de llargor. Darréu tocará la presentación, prevista pa últimos de mayu o xunu en llugar entovía por confirmar, y numberosos bolos yá zarraos pa tol branu.

‘A música tradicional del Eo-Navia’ va recoyer 15 cantares, grabaos en Corvera, nos estudios Tutu de Sergio Rodríguez, destinaos pal baille, como tol repertoriu de Caldo y Os Rabizos, grupu fundáu nel 2015 que nun paró de tocar en tou esti tiempu. “El discu ye un repás de lo que facemos normalmente en direuto”, apunta’l tamién filólogu y escritor, “con temes tradicionales puros y otros tradicionales con autor, como la familia Alonso de Miudes, n’A Caridá”.

Acompañen a Migue y el so tambor nel proyeutu Andrés Rodríguez Monteavaro (gaita), Pepín de Muñalén (saxofón), Marga Lorences (acordión) y Ruma Barbero (bombu).

Recompenses

Les persones que quieran participar na cuestación popular na rede de Caldo y Os Rabizos disponen entá de delles opciones, que van dende una aportación de 5 euros o una descarga dixital del discu por 7 euros, a una actuación en direuto y una reseña especial nos creitos del discu por 900 euros.

Sicasí, la opción más demandada hasta’l momentu, ensin contar cola venta cenciella del discu físicu, ye’l nomáu ‘Pack ferro’, por 60 euros, qu’inclúi’l propiu discu físicu, una bolsa y una camiseta de la banda, apaecer nos creitos y una navaya de Taramunde edición ‘Caldo y Os Rabizos’ fecha por Juan Carlos, que yá ta escosáu.

Na semeya, Barbero, Pepín de Muñalén, Miguel Rodríguez Monteavaro, Lorences y Andrés Rodríguez Monteavaro.