El Gobiernu asturianu repartió ente los emigrantes asturianos más de 50.000 discos con palabres del presidente Areces

"Emigrantes asturianos repartíos per tol mundu recibieron les pasaes navidaes un CD que, baxo'l títulu ""Cerca de Asturias"" incluye once cortes con versiones de temes tradicionales asturianos executaes por artistes como Joaquín Pixán, Anabel Santiago y Alberto Varillas, Liliana Castañón, Rosario González, Diamantina Rodríguez o l'Orfeón de Mieres ente otros artistes. El CD ábrese con un primer corte nel que'l presidente asturianu Vicente Alberto Álvarez Areces fai un discursu emponderando al colectivu emigrante asturianu. Nel corte, que dura dos minutos y mediu, Areces fala del ""progresu y bienestar d'Asturies "" y felicita les navidaes y l'añu 2007 a los emigrantes asturianos.

Asturies.com pudo saber que la realización del CD corrió al cargu de la empresa Ámbitu - L'Aguañaz. Xune Elipe, responsable de la estaya musical de la conocida empresa cultural asturiana, confirmó a Asturies.com qu'ellos foron los encargaos de la xestión y realización material del CD, que tuvo una tirada de 55.000 exemplares, siendo los 11 cortes que s'inxerten nel mesmu estrayíos d'otros trabayos anteriores . El responsable de la casa discográfica esplicó que, en cualquier casu, la xestión del CD foi ""un encargu como otros"" que lleguen a la so empresa y que l'autoría de la edición del mesmu correspuende, en tou casu, al Gobiernu del Principáu d'Asturies, según se conseña nel ""Anuariu de la Música Asturiana"" qu'edita la mesma casa L'Aguañaz..

D'otra manera, el repartu masivu del CD pente la emigración asturiana fízose ensin el conocimientu directu del órganu de gobiernu competente en materia d'emigración. Luis Miguel Fernández Romero, responsable de l'Axencia Asturiana d'Emigración, declaró a Asturies.com que les primeres noticies sobre ""Cerca de Asturias"" llegáren-y al traviés d'emigrantes asturianos que-y comentaren, a títulu individual, que recibieren el CD. Fernández Romero, que s'alcuentra güei en Mendoza (Arxentina) nel trescursu d'una de les sos visites a la emigración asturiana, nun quixo facer valoraciones polítiques sobre la edición y repartu de ""Cerca de Asturias"", cosa que dexó en manes de la so formación política, Izquierda Xunida.

Nel artículu sobre esta noticia en El Comentario.TV pue atopase enllaz al audio col discursu d'Areces inxertu nel CD."