Argüelles dimite como coordinador d'IX y el PP destitúi a Venta por amenaces al so compañeru González

La política asturiana, a la puerta de les dos xornaes eleutorales, ta viviendo movimientos importantes. Ramón Argüelles dimite como coordinador xeneral d’IX tres la victoria d’Ángela Vallina, mentes que nel PP hai marexada pola destitución de Luis Venta como secretariu xeneral tres unes amenaces a Pablo González Menéndez.

“La mio dimisión foi porque nun fui quien a facer una llista xunitaria y nun fui quien de, cola mio propia llista, la llista organizativa, sacar una mayoría pa poder intentar esa xunidá que sí ye posible”, esplicó Argüelles sobre la so decisión. L’ex alcade de Ḷḷena va siguir como coordinador xeneral en funciones hasta que los órganos d’Izquierda Xunida (IX) decidan, nes selmanes próximes, un coordinador interín nuevu hasta l’entamu d’una asamblea nueva.

Otra manera, ayeri salió a la lluz la esistencia d’una carta anónima al secretariu xeneral del PP de Xixón, González Menéndez, unviada al despachu popular na Casa Conceyu. Nella recibía amenaces sobre la difusión d’informaciones sobre la so actividá profesional y personal tres acusalu de “timar a los vecinos de Xixón” –emplegóse nésta y n’otra ocasión nel testu’l topónimu tradicional de la ciudá, oficial xunto col castellanu ‘Gijón’–.

Tres denuncialo, les investigaciones policiales señalaron a Venta como responsable de la mesma, anque ésti niega que l'autoría sía de so. Sicasí, el presidente del PP, Pablo Casado, decidió la destitución de tolos sos cargos al hasta agora secretariu xeneral del partíu n’Asturies.

Na semeya, Argüelles nel momentu de comunicar la so decisión.