La manifestación pola oficialidá del 6 d’abril calez motores con baille tradicional

A falta de menos d’un mes pa que Xixón acueya otra gran manifestación, nesti casu pola oficialidá de la llingua asturiana y del gallego-asturiano, la sociedá asturiana empieza a movilizase de cara a la convocatoria del 6 d'abril. El Grupu de Baille Tradicional San Félix entama esti sábadu un baille reivindicativu en Candás.

Va ser la primer de les munches actividaes previes a la manifestación ‘L’asturianu llingua oficial ¡agora!’ que se van a organizar en toda Asturies depués de los numberosos contautos calteníos pola Xunta pola Defensa de la Llingua Asturiana (XDLA) con asociaciones de toa triba pa esparder la cita con salida a les 18 hores de L’Humedal. D’esta forma, el coleutivu pretende facer llegar la reivindicación a más xente al traviés d’eventos culturales, deportivos o gastronómicos nes que participen organizaciones favoratibles a la oficialidá que, pola so condición, nun participen de manera direuta nel movimientu de reivindicación llingüísitica.

Ye’l casu del Grupu de Baille Tradicional San Félix, de Candás, comprometíu col baille asturianu y la llingua asturiana, que se suma al 6-A col entamu de una actividá que lleva’l nome de ‘Bailla na plaza pola oficialidá’. Ésta va desendolcase’l sábadu, de 12 a 13 hores, na plaza La Baragaña, y ta abiertu a tol públicu, sepan o non baille tradicional.