L'independentismu escocés aspira a la mayoría nos 300 años d'unión ente Inglaterra y Escocia

"Esti martes 16 de xineru cúmplense los 300 años del tratáu d'anexión ente Escocia y Inglaterra. L'aniversariu tien llugar a pocos meses d'unes elecciones nes que les encuestes albidren el posible trunfu del partíu independentista Scottish National Party, dalgo que supondría un socesu históricu. En cualquier casu, anque'l SNP llograre'l trunfu, veríase obligáu a facer una coalición pa la que los hipotéticos socios sedríen los lliberal-demócrates o otros partíos independentistes, socialistes o Los Verdes, que tamién aspiren a consiguir escaños nel Parlamentu d'Edimburgo. El SNP pide nel so programa la celebración d'un referéndum pola independencia y, en casu de ser favorable'l resultáu, la solicitú a la UE del ingresu d'Escocia como país Independiente.

El posible crecimientu de la resquiebra ente inglaterra y Escocia llama l'atención n'Inglaterra. Gordon Brown, que tien toles posibilidaes de ser el sustitutu de Tony Blair al frente del llaborismu y que ye tamién escocés, fizo esta mesma selmana un llamáu a los partidarios de la unión británica ""a resistir una deriva hacia la balcanización"" nuna tribuna qu'asoleyó'l Daily Telegraph. Les posiciones tán cada vegada más enfrentaes, y. Mientres n'Escocia garra puxu la idea de la independencia, sobremanera contando col poder económicu que daríen los recursos petroleros del Mar del Norte, n'Inglaterra crez un ambiente de rocea con Escocia, que disfruta d'una mayor cobertura de la seguridá social y onde los estudios universitarios son de baldre, al revés que n'Inglaterra.

La unión a Inglaterra de 1707 dexó a Escocia ensin independencia política, anque Escocia caltuvo'l derechu a emitir moneda propio y a decidir la so política educativa o de sanidá, amás de tener selecciones deportives propies. Nel añu 1998, el Gobiernu de Tony Blair entamó la política de ""devolución"" pola que se-y concedía autonomía a Escocia. L'oxetivu d'esta ""devolución"" yera'l de satisfacer al nacionalismu escocés, qu'agora, nueve años dempués, pica a la puerta de la mayoría política.

Más información en BBC, Scotland on Sunday, Daily Telegraph Politics UK Guardian The Times The Independent"