La llegada del agua facilita la estinción de les quemes esistentes

Les primeres lluvies, xunío al esfuerciu de los equipos d’estinción, reduz a 13 les quemes esistentes n’Asturies, de les que 8 tán controlaes. El Gobiernu baxó a situación 1, a les 10.15 hores d’esti miércoles, el Plan Especial de Quemes Forestales (INFOPA).

Asturies alboreció con 29 quemes en 17 conceyos, cantidá qu’a les 9 hores reducíase a 22. Col pasu la mañana, y gracies a la llegada del agua y al esfuerciu de los bomberos y de los equipos d’estinción del fueu, los focos quedaron en 13, 8 controlaos y 5 activos.

Los esfuercios mayores concéntrense agora mesmo en Viescas (Castañéu, Valdés), Rifabar (Piloña) y Campanal (Nava). Les predicciones meteorolóxiques pa mañana tamién son positives pa finar con estes quemes, la gran mayoría intencionaes, depués de qu’ayeri les raches de viento complicaren les xeres d’estinción.

Na semeya, Bomberos d'Asturies y personal d'empreses forestales rematen esta mañana la estinción d'una quema en Castañéu (Valdés).