Asturies alboreció con 99 quemes en 32 conceyos

Les quemes intencionaes, nestes xornaes de condiciones favoratibles pa la espansión de fueu, tornen a amburar Asturies. El país alboreció con 99 focos rexistraos en 32 conceyos, tando concentraos tolos esfuercios d’estinción en 15 d’ellos.

Mientres la madrugada’l númberu de quemes llegó a los 139, según informaron dende’l Gobiernu. A les 9 hores baxaron hasta 99, siendo trés especialmente esmolecientes: en Soutu los Infantes (Salas), en Llordón (Cangues d’Onís) y en Naves (Llanes).

Tamién se trabaya n’otros 12 en Cabrales, Uviéu, Piloña, Pravia, Les Regueres, Ribeseya, La Ribera y Valdés. El restu d’incidentes, un total de 84, tán en siguimientu y pendientes de revisión, actuación que dende primera hora de la mañana ta llevándose de forma coordinada ente  la Guardería de Mediu Natural y dos de los helicópteros del Serviciu d’Emerxencies del Principáu d’Asturies (SEPA).

A les 14 hores anuncióse que'l númberu de quemes rebaxóse a 44. Éstes céntrense nun total de 17 conceyos.

INFOPA

Dende ayeri a les 19 hores, el país ta na situación 2 del Plan de Quemes Forestales (INFOPA), que permite la intervención de medios non asignaos al plan, como pue ser la Unidá Militar d’Emerxencies. Dende’l Gobiernu solicitaron al traviés de la Delegación del Gobiernu estatal n’Asturies la so participación, que se contabiliza en 50 efeutivos, 6 autobombes y dos vehículos nodriza.

El vienres, a les 14.44 hores, el conseyeru de Presidencia y Participación Ciudadana, Guillermo Martínez Suárez, activara l’INFOPA, que taba en fase d’alerta dende’l 15 de xineru, en fase d’emerxencia en situación 0. Ésti foi xubiendo niveles a lo llargo d’estos díes.

Según espuso’l socialista tres la reunión d’esta mañana del Comité de Direición del INFOPA en Llamorgal, va ser necesario tar sollertes nes hores próximes por mor de les previsiones qu’anuncien falta d’agua y raches fuertes de vientu de sur. Tamién confirmó que la mayoría de les quemes que ta viviendo Asturies son intencionaes, llegando a falar d’un porcentaxe superior al 80 por cientu del total.

Normalización de la cultura del fueu

La Coordinadora Ecoloxista d’Asturies afirma que “nun se pueden permitir más folaes de quemes provocaes como les que tamos viviendo” y señala al llevantamientu que fixo’l Gobiernu en marzu del 2017 de los acotamientos al pastoríu de les zones quemaes, “yá que se taba normalizando inda más la cultura del fueu”. “Esi día’l Parllamentu asturianu dio vía llibre para que los montes siguiesen amburando, contribuyendo a crear un clima de tolerancia y impunidá a los que quemen ensin autorización. Bona prueba d’ello ye que mientres nel restu del Estáu español ta consiguiéndose baxar el númberu de quemes, n’Asturies siguimos la tendencia contraria”, añade.

Na imaxe, quemes n'Ayande. Semeya propiedá de la Coordinadora Ecoloxista d'Asturies.