Dos antiguos presos de Guantánamo visiten Asturies convidaos por Amnistía Internacional

"Ruhel Ahmed y Asif Iqbal, dos antiguos presos del centru de detención que tienen los EEUU na so base militar de (Cuba) van visitar esta selmana Asturies convidaos pola organización Amnistía Internacional dientro de la so campaña esixendo'l pieslle d'esti presidiu onde denuncia que nun se cumple'l más mínimu respetu a los derechos humanos.

El testimoniu d'estos dos antiguos presos de Guantánamo foi la base del argumentu de la película ""camín de Guantánamo"" del director inglés Michael Winterbottom. Ruhel y Asif, nacionalizaos británicos, denunciaron como la so traxedia entamó na seronda del 2001, poques selmanes dempués de los ataques terroristes a los EEUU, cuando los prindaron nun viaxe que fexeron a Pakistán con motivu de la boda d'un amigu. Dempués de dos años presos en Guantánamo nes peores condiciones imaxinables, les autoridaes americanes punxéronlos en llibertá ensin cargos, siendo'l día de güei qu'entovía nun saben por qué cargos los metieron presos n'aquel llugar.

Ente otres irregularidaes, Amnistía Internacional asegura que en Guantánamo hebo presos rapacinos de 13 años y xente inocente que namás ""tuvo nel llugar enquivocáu nel momentu enquivocáu"" entregao dede Pakistán o Afganistán a cambiu de recompenses de miles de dólares.
Más información na web d'Amnistía Internacional sobre Guantánamo"