El Farho Xixón Baloncestu perdió nel últimu minutu por un puntu

"El Farho Xixón Baloncestu salió derrotáu del campu de la U.B. La Palma, pol resultáu de 79 a78, nun partíu que se decidió nel últimu minutu, nel que s’entró con empate a 73. L'equipu xixonés ye agora decimusestu empatáu a siete victories con otros trés equipos, Burgos –decimoquintu- , Tenerife –decimusétimu- y Tarragona –últimu-. El sábadu l’equipu asturianu va xugar col Huelva en La Guía.

El partíu entamó con un primer cuartu nel que los xixoneses tuvieron delantre y ganáronlu con un 13 a 14. Nel segundu periodu llegaron a tener ventayes d’hasta seis puntos, 20 a 26, pero nun la foron a caltener y al descansu llegóse con un 32 a 28. Nel tercer periodu los asturianos atascáronse y los locales llegaron a tener una ventaya de dolce puntos, 55 a 43. A lo cabero’l periodu llegóse con un 55 a 47. Ente fines d’esti cuartu y l’entamu l’otru Antxon Iturbe metió ocho puntos.

Nel últimu periodu los asturianos remontaron pa metese nel partíu cuando faltaben dos minutos pa finalu, pero ello nun-yos valió pa ganar. Nel últimu minutu, intensu por demás, Wachsmann punxo en ventaya al so equipu a 35 segundos pa finar, entós Prado pidió tiempu muertu. Waleskowski encestó y ficiéron-y personal, anque falló’l tiru amestáu, y punxo l’empate a 75. Una personal a Mena, qu’encestó un tiru llibre, foi'll 76 a 75. Darréu Poves fizo pasos y nel saque a Waleskowski tocáron-y personal antideportiva a Mena, qu’al encestar los tiros llibres punxo’l 78 a 75. De nueves hebo falta a Mena, con un tiru llibre que foi'l 79 a 75. Narros con un triple dexó’l marcador nel definitivu 79 a 78.

Nel Farho Xixón el meyor foi Keith Waleskowski (16 puntos, 7 rebotes, 2 balones recuperaos, punxo 1 tapón, ficiéron-y 3 faltes personales y tuvo una valoración de 19 puntos). Tamién hai de destacar a Iñaki Narros, que volvía a xugar tres la mancadura que tuviere (16 puntos, 2 rebotes, 2 asistencies, punxo 1 tapón y ficiéron-y 1 personal) ya Isma Tores (10 puntos, 3 rebotes, 1 asistenca, 1 balón recuperáu, 2 balones perdíos y ficiéron-y 7 faltes personales). Nel equipu islleñu destacaron Raúl Mena (12 puntos, 2 rebotes, 5 asistencies, 3 balones recuperaos, 1 balón perdíu y ficiéron-y 6 faltes personales), Juan Carlos Liñán (10 puntos, 5 rebotes, 5 asistencies, 4 balones recuperaos, 3 balones perdíos y ficiéron-y 2 faltes personales) y Steven Edwards (12 puntos, 4 rebotes, 9 asistencies, 3 balones perdíos, punxo 1 tapón y ficiéron-y 3 faltes personales.

Ficha téunica:

U. B. La Palma: Raúl Mena ((12), Alfonso Albert (10), Juan Carlos Liñán (10), Quique Bárcenas (8) y Steven Edwards (12). Tamién xugaron: Alexis Wachsmann (8),Francis Koffi (4), Andre Turner, Sebastián Arrocha (8) y Kestutis Sestokas (7).

Farho Xixón Baloncestu: Dani López (9), Peter Rajniak, Mark Bigelow (7), Isma Torres (10) y Keith Waleskowski (16). Tamién xugaron: Chus Poves (7), Iñaki Narros (16), Rubén Suárez (3), Txomin López y Antxon Iturbe (10).

Árbitrios: Alberto Sánchez Ardid y Raúl San Cecilio Cejuela. Nengún de los dos equipos tuvo xugadores eliminaos por cinco faltes personales. Partíu de la decimonovena xornada de la Lliga Adecco LEB xugáu nel Pabellón Miraflores de Santa Cruz de La Palma. Parciales per cuartos: 13-14, 23-18, 19-15 y 24-31."