Edítase un llibru de recursos didácticos pa la clase de llingua asturiana

La Conseyería d'Educación y Ciencia, en collaboración col Centru de Profesores y Recursos del Oriente, ta acabante d'espublizar "A la gueta de material espardío", un llibru que cuenta poder ufiertar recursos didácticos pa les clases de Llingua Asturiana na Educación Secundaria.
Los autores, Xurde Fernández y Marián García, estructuren la información por temes, faciendo en cáun d'ellos una pequeña introducción de tipu teóricu que da pasu a los exercicios pa trabayar aspeutos de llingua oral y escrita, analís y creación lliteraria y dellos aspeutos socioculturales.
El volume cuenta amás con una serie d'anexos nos que se recomienden llibros y se traten temes tresversales al tiempu qu'aborden determinaes cuestiones de la llingua y la lliteratura eonaviega.