Los Verdes denuncien l'impactu del campu de golf pa Verdicio

"La construcción d'un campu de golf con urbanización de xalés en Verdicio (conceyu de Gozón), que yá tien aprobáu l'estudiu d'impactu ambiental, provocó la reacción del partíu políticu ""los Verdes d'Asturies"" que formularon alegaciones al estudiu que dicen que nun-yos respondió l'alministración responsable.

Los Verdes aseguren que'l proyectu tien arreyáu ""un impactu mui relevante nel mediu en que va desarrollase"" al tratase ""d'un entornu rural agrícola que va vese alteriáu radicalmente cola construcción de centenares de xalés con un diseñu ayenu dafechu al de la vicienda tradicional asturiana"". Esta y otres alteriaciones debíes a la sustición de la vexetación del llugar por especies ayenes propies de los campos de golf y trataes con abondancia de productos fitosanitarios van llevar, según Los Verdes, a cambeos radicales nel entornu natural d'un llugar qu'amás va ver como s'agraven os problemes que ya carez de suministru d'agua y que va precisar de carreteres nueves pa dar serviciu a los xalés proyectaos.

Los Verdes afirmen que proyectos como'l de Verdicio contradicen la llectura del Gobiernu asturianu, qu'afirma que l'asturiana ye la costa que meyor se caltién nel estáu y píde-y al conceyu de Gozón que faiga Plan d'Ordenación Urbana y que dexe de desarrollar urbanísticamente'l conceyu al traviés de convenios urbanísticos y planes parciales ""al calor de los intereses empresariales del especulador de turnu""."