La senadora Casanova toma posesión del cargu

Ocupa l'escañu del fináu Álvarez Areces.

Guadalupe María Casonova 'Lupe' prometió acatar la Constitución española ayeri na sesión del Senáu pa tomar cargu como senadora por Asturies. Nacida en Sama nel añu 1963, desendolcó la so trayeutoria política en Samartín del Rei Aurelio, onde anguaño ye conceyala de Servicios Sociales y Vivienda, amás d'encargase dende'l 2015 de la Vicesecretaría Xeneral de l'agrupación llocal del PSOE.

Enantes tuvo venceyada al sindicatu del Metal, Construcción y Afines (MCA-UXT) como secretaria de Formación en Siero y, depués, como secretaria d'Igualdá de la Comisión Executiva d'Uviéu. La direición socialista del Senáu decidió que Lupe ocupe'l cargu de vocal de la Comisión d'Asuntos Esteriores, amás de quedar fixada a la Comisión Mesta Congresu y Senáu de Rellaciones col Defensor del Pueblu.

Dos senadores socialistes

La llangreana sustitúi na Cámara Alta a Vicente Álvarez Areces, políticu escoyíu como senador nes urnes nel 2016 que finó'l pasáu 17 de xineru. Casanova diba como suplente na llista de la FSA, que namái algamó un representante.

La segunda senadora socialista ye María Fernández Álvarez, nesti casu por designación de la Xunta Xeneral. El restu de senadores asturianos son Fernando Goñi (PP), tamién nomáu pol Parllamentu nacional, y Mario Arias y Ovidio Sánchez (PP), y Rosa María Domínguez de Posada (Foro), por mandatu de les urnes.

Na semeya, momentu nel que Casanova promete'l cargu frente al presidente del Senáu, Pío García-Escudero.