Un Sporting torpe nun pudo col Poli Ejido

El Sporting de Xixón perdió pola mínima nel so campu énte'l pooli Ejido, ún de los equipos que meyor imaxen dieron nel Molinón nesta lliga no tocante a esfuerzu y enfotu pol trunfu. Les rotaciones que fizo Manolo Preciado nel so equipu, siendo Raúl Cámara, Chus Bravo, Pedro, Omar y Andreu, novedaes n'alliniación titular, influyeron nel xuegu del Sporting, que combinó peor y que nun tuvo tán sueltu como davezu.

En pasando los primeros minutos de tantéu, el Poli Ejido decatóse d'ello y entamó a apertar muncho sobre los futbolistes más febles del Sporting, que tenía problemes pa facer circular el pelotu. L'equipu visitante tiró de pases llargos y velocidá pa ganá-yos la espalda a los centrales asturianos, que nun tuvieron el día.

Yá na primer parte Toedtli metió mieu con un bon remate que dio nel palu, pero foi nel segundu tiempu cuando'l Poli apertó con gana sobre la portería de Roberto, que fexo delles intervenciones de gran calidá pero que nun pudo facer nada na contra rapidísima na que vieno'l gol del Poli, obra de Toedtli dempués d'una bona combinación na que los visitantes sentaron a la defensa local. Les entraes de Javi Fuego, Diego Castro y Karanka ficieron esconsoñar algo al Sporting, que tuvo cerca d'empatar nun partíu que s'espurrió más de siete minutos sobre la hora al detenese'l xuegu por tener los médicos qu'entrar a atender al porteru del Poli, que tuvo un choque con Congo.