SUATEA amenaza con entamar movilizaciones na enseñanza si Educación nun entra a negociar

"Dempués del so trunfu nes pasaes elecciones sindicales de la enseñanza non universitaria, el sindicatu SUATEA dio una rueda de prensa na qu'esplicó les llinies poles que va mandase la so actuación sindical, ente les que rescampla la so oposición al Estatutu de la Función Pública Docente. El sindicatu unvia-y un recáu claru a la conseyería: o negocia o va alcontrase con una campaña de movilizaciones pa llegar ""hasta onde faiga falta"".

La organización sindical adelantó que yá tuvo una primer reunión col conseyeru Riopedre, anque esta namás tuvo calter de ""protocolaria"" polo que solicitó una nueva ""d'urxencia"" na que-y quier tresmitir dellos puntos de negociación cola que superar la ""política de marxinación sindical"" qu'afirma que tien la conseyería . El primeru d'ellos, de tipu salarial, pasa pela negociación d'un alcuerdu sobre'l complementu retributivu autonómicu. SUATEA quier que se sustituya l'actual y que s'iguale cola media retributiva del restu de profesoráu del Estáu. La negociación d'un pautu d'estabilidá del profesoráu interín y la equiparación de condiciones de trabayu d'esti colectivu col profesoráu funcionariu ye otru de los puntos fuertes no tocante a condiciones llaborales, pidiéndose pa ellos el reconocimientu de l'antigüedá.

La creación de la especialidá de Llingua Asturiana, cola dignificación de l'asignatura y del profesoráu que la imparte va ser otru de los puntos fuertes de la negociación pa SUATEA xunto cola negociación de los desarrollos de la Llei Orgánica d'Enseñanza (LOE).

El trunfu de SUATEA nes elecciones asturianes diose dientro d'un contestu en que la confederación estatal STES, a la que pertenez la organización asturiana, ye tamién la mayoritaria na enseñanza. Por ello dende SUATEA anúnciense delles midíes tamién empobinaes a apertar sobre la Ministra d'educación Mercedes Cabrera. La retirada del Borrador d'Estatutu Docente y l'apertura de negociaciones na Mesa Sectorial d'Educación apaecen equí como puntos clave pal sindicatu, que denuncia que'l modelu d'estatutu docente defende una mayor competencia, división y xerarquización de los docentes. El sindicatu asturianu tamién va pidir al traviés de la intersindical, la retirada del Borrador d'Accesu a la Función Pública Docente ""porque nun igua de forma definitiva l'accesu a la función pública del profesoráu interín"" puntuando la esperiencia del aspirante perbaxo de lo que se facía hasta agora."