El conceyu de Llangréu presenta la campaña de normalización "Afayáivos en Casa"

"L'Alcaldesa de Llangréu, Esther Díaz, presentó la campaña ""Afayáivos en Casa"" na escuela de 0 a 3 años ""Rapacinos"". Afayaívos en Casa ye una campaña de normalización social del asturianu que l'Ayuntamientu de Llangréu pon en marcha en collaboración cola Rede de Normalización Llingüística nos Conceyos. Cola puesta en marcha d'esta campaña, L'Ayuntamientu de Llangréu mira por dos oxetivos, d'un llau, quier ser de los primeros en felicitar a los nuevos pas y mas del conceyu. D'otru llau, pa da-yos la bienvenida fai usu de la Llingua Asturiana tratando d'afalar normalización social del usu del asturianu, convidando a educalos en valores de tolerancia y respetu.

La campaña afirma na so presentación que ""Tener un fíu o una fía ye una aventura, un viaxe enllenu de nueves esperiencies. Un viaxe que tampoco nun ye fácil, educar a un neñu o una neña implica tomar decisiones, escoyer lo que crees meyor pa él o pa ella y formalu/la pa que seya parte de la sociedá que-y va tocar vivir. Pero tamién ye tresmiti-yos lo meyor de nosotros y nosotres, lo que nos arrodia y lo que nos caracteriza. La guapura'l mundu radica en qu'esti ye diversu y reconocer esa diversidá y valorala fainos meyores persones. Los asturianos y asturianes participamos d'un gran tesoru común, llevamos milenta años entendiendo'l mundu al traviés de la llingua asturiana. Nes nuestres manes ta que sigamos entendiéndolu con ella y podamos ser nuevos y vieyos a la vez, los de siempre pero d'otra manera"". Los materiales que el Ayuntamiento de Llangréu va distribuyir con esta campaña consisten nuna carpeta que sirve pa presentar los materiales cola imaxe de la campaña y una propuesta de nomes pa neños y neñes n'asturianu, un baberu, una pegatina pa la trasera del coche, un mididor de paré, un calendariu-guía onde s'esplica'l desarrollu evolutivo del neñu de los 0 a los 18 meses. Estos materiales van unviase a les cases de los neños y neñes que nacieren nel conceyu nos últimos 6 meses y tamién pa les escueles de 0 a 3 años, pal Hospital Valle del Nalón de Riañu, y pa les aries de pediatría de los centros de salú del conceyu."