Industria va penalizar la construcción de más centrales térmiques n'Asturies

"El Ministeriu d'Industria dio orden esta selmana a la Comisión Nacional de la Enerxía pa que prepare un plan qu'afaye la localización xeográfica de les nueves centrales térmiques a construyir n'España al traviés d'incentivos y de penalizaciones que primen la construcción d'estes centrales en comunidaes en que nun tengan cubierta la so demanda eléctrica, racionalizando asina'l mapa enerxéticu y evitando que les empreses faigan toles sos centrales nueves en comunidaes de la costa como Asturies mientres que grandes centros de consumu como Madrid carecen de centrales propies y tienen qu'importar tolo que consumen.

L'anuncia d'esta iniciativa del Gobiernu del Estáu pue alteriar, y muncho, los proyectos de centrales térmiques previstes p'Asturies, comunidá yá escedentaria en producción de corriente y na qu'hai previstos una docena de grupos térmicos nuevos per tol centru d'Asturies, los más d'ellos a gas, que doblaríen l'actual capacidá de xeneración de l'autonomía.

L'anuncia del ministeriu que dirixe Joan Clos prestó enforma n'ámbitos comprometíos col mediu ambiente asturianu. Asina, la organización ""Ecoloxistes n'Acción"" declaró qu'esta midida diba ayudar a recuperar ""la cordura"" nel actual sistema enerxéticu, siendo una ayuda pa ""que se produza la enerxía cerca d'onde se consume, y non como agora que delles autonomíes cargamos cola producción y los costes ambientales que lleva arreyaos en contaminación del aire y llinies d'alta tensión.

Los ecoloxistes sorrayen que ""la carrera d'instalaciones térmiques que favorez el Gobiernu asturianu namás va aumentar los malos valores ambientales que tenemos n'Asturies"", comunidá qu'aseguren que tien ""el peor aire d'España, la mayor morbilidá por razones ambientales y que ye la rexón europea que mas CO2 produz por habitante""."