L’autonómica sigue allancada nes audiencies

"Los datos d'audiencia de la televisión autonómica asturiana siguen ensin esconsoñar dempués de más d'un añu del entamu de les emisiones, rescamplando lo desequilibrao del númberu d'espectadores que llogra según faces horaries y programes. Anque a lo llargo de les últimes elmanes la TPA llegó a consiguir porcentaxes medios d'audiencia na raya del 4%, l'autonómica nun ye a afitar esa xuba y asina rrexistra díes con udiencies medies na banda del 2% o incluso perbaxo, como'l pasáu 4 de xineru en que namás llogró un 1,6% de cuota.

Garrando'l pasáu llunes día 8 como día de muestra, la canal pública asturiana llogró un datu del 2,2% d'audiencia media. Nesi día, el programa más vistu foi ""El Gusto es mío"" espaciu de cocina que llogró un 8,4% de cuota de pantalla y sentó delantre del aparatu a cerca de 19.000 espectadores. ""Conexión Asturias"" con un 7,7 %, foi'l segundu programa más vistu, con un 7,7% y 15.000 persones viéndolu, mientres que la segunda edición del informativu de la TPA algamó'l 5,8% con 16.000 espectadores. Estos espacios emítense toos na mesma banda horaria de tarde-nueche, la única en que los rexistros d'audiencia de la TPA son a reblagar penriba del 5% sacantes la primer edición del informativu, que llegó al 4,8% d'audiencia.

N'otres faces horaries la TPA presenta númberos probes enforma. Asina na tarde, el magazin ""Con 2 de azúcar"" (16:00h) nun llegó al 1%, marcando la reposición de la serie ""superagente 86"" (15:00h el momentu más baxu del día con un 0,2% d'audiencia. Nel prime time y la nueche, los programes de la TPA tampoco llamaron l'atención de los espectadores. Por exemplu, l'espaciu ""Somos así"" que s'emite n'acabando los deportes de la nueche, quedó nun 0,7%, mientres que l'espaciu de la nueche ""mañana usted madruga"" (22:00h) llogró'l 0,8% con 4.000 espectadores. Nesta faza horaria, namás la reposición de la serie ""matrimonio con hijos"" que se pasa a les 21:30h, llegó al 2,9% de cuota.

En comparanza coles demás autonómiques nueves qu'entamaron les sos emisiones nel últimu añu, TPA meyora por poco los datos de la murciana 7RM, que tuvo esi llunes 8 de xineru un 1,8% de cuota, pero asítiase bastante per detrás de l'aragonesa ATV, que llogró una cuota media del 5,3%, y mui lloñe de la canal balear IB3, que rexistró un 7,1% de cuota media y que llevó al so informativu ""IB3 Notícies Mallorca"" a un 20% de cuota."