Del Busto llama a aprobar agora la Llei de Salú "pa nun perder otros dos o trés años"

Asegura que'l testu definitivu "mui poco va diferir d'ésti", en trámite na Xunta Xeneral.

El conseyeru de Sanidá, Francisco del Busto, informó ayeri nel Parllamentu sobre esta iniciativa y sorrayó que la norma "ye la base pal desarrollu y implantación d'una política sanitaria na comunidá autónoma que facilite l'adaptación a modelos nuevos d'atención sanitaria y salú pública, y la priorización de la perservación de la salú asina como l'abordaxe d'enfoques nuevos d'atención a la enfermedá y de los procesos de rehabilitación social". En resume, pa "caltener y consolidar el desendolcu d'un modelu sanitariu universal, de calidá, equitativu, sostenible y cola mayor capacidá de prestación y servicios".

Destacó que’l testu llegal ye la plataforma pa desenvolver polítiques qu’atienden a la salú individual de les persones, cola atención a los procesos d’enfermedá, y a les comunitaries. Asina, trata cuestiones como la educación y la promoción de vezos afayadizos, aspeutos medioambientales y determinantes sociales.

Amás, potencia una rede de servicios que dexa encarar les necesidaes de los pacientes, de los sos familiares y de la sociedá en conxuntu. Pa eso, el Gobiernu apuesta por reforciar el papel de l’Atención Primaria, el trabayu multidisciplinar y la cooperación colos servicios sociales y el tercer sector.

D'igual forma la norma configura’l sistema sanitariu como’l conxuntu organizáu de tolos recursos que son quienes a influyir sobre l’estáu de salú de la población, asitia’l mapa sanitariu como preséu primordial de la planificación territorial y configura una rede integrada de servicios que va xestionar los procesos de promoción de la salú y prevención de les enfermedaes, la coordinación asistencial, el fomentu de los autocuidaos y l’atención a pacientes crónicos, ente otros fines. Tamién afita que’l marcu de referencia pa toles actuaciones en materia de salú y servicios sanitarios va ser el Plan de Salú, que se va presentar esta selmana.

Otru de los aspeutos más relevantes del proyeutu de llei ye que crea, ente otros órganos, el Conseyu de Pacientes del Principáu d'Asturies, que favorez la participación social, y l’Observatoriu de Garantía de Derechos y Deberes en Salú, cola mira de reforzar la proteición de los usuarios n’ámbitos como la intimidá, la confidencialidá y l’autonomía de decisión.

Participación amplia

El documentu ye frutu del consensu y de les aportaciones d’axentes de dellos ámbitos de la sociedá. Na so ellaboración contóse col sofitu del Conseyu Asesor de Sanidá y de la Cátedra de Derechu Alministrativu de la Universidá d’Uviéu, lo mesmo que de persones relevantes del ámbitu sanitariu autonómicu y nacional. Tamién participaron, ente otros, colexos profesionales, la Federación Asturiana de Conceyos (FACC), organizaciones sindicales y asociaciones y coleutivos venceyaos col ámbitu de la salú.

Esta norma nueva sustuirá a la vixente dende'l 1992, nun contestu de tendencies sociales, demográfiques, epidemiolóxiques y de xestión nueves, qu’afeuten fondamente a los sistemes sanitarios. Fenómenos como la cronicidá, la pluripatoloxía y l’avieyamientu de la población obliguen a configurar un patrón d’atención cada vez más complexu y eficaz.

Na so comparecencia, el conseyeru destacó la importancia del testu y pidió’l sofitu de los grupos parllamentarios pa la so aprobación. “El documentu abarca lo más importante, ye xeneral, claru y abondo equilibráu pa que toles sensibilidaes puedan reconocese nel testu”, valoró, pa depués señalar que "por muncha priesa y interés que se ponga na llexislatura próxima, la busca de consensos políticos sociales de tramitaciones alministratives nos fadrán perder otros dos o trés años como mínimu, pa, en too casu, acabar aprobando un testu que poco va diferir d'ésti".

Na semeya, José Ramón Riera, xerente del Serviciu de Salú del Principáu d'Asturies (Sespa); Del Busto; y Concepción Saavedra, direutora xeneral de Planificación Sanitaria.