Cómic manga y lliteratura xuvenil, primeres novedaes editoriales n'asturianu del 2007

"Mari Luz Pontón, especialista en lliteratura infantil y xuvenil n'asturianu y collaboradora d'Asturies.com, presenta estos díes xunto cola dibuxante asturiana Ángela Fernández, el cómic ""La maldición"" el primer tebéu n'asturianu que sigue l'estilu del ""manga"" nipón, un rexistru d'estilu en que ta especializada esta moza dibuxante que yá se diere y qu'edita la casa KRK. Catuxa, la protagonista de la historia, ye una rapacina de 16 años que regresa nes vacaciones de branu al pueblu a ver a so güela después de 8 años de nun tener contactu con ella. El viaxe va ser daqué iniciático, y nel realcuentru cola güela, la neña va conocer el misteriu de les muyeres de la familia. El llibru va presentase esti vienres 12 na FNAC del centru comercial ""Parque Principado"" de Siero a les 19:30h.

D'otra manera, la editorial asturtoons espublizó esta selmana seis nuevos títulos dientro de la so colección ""Llingua de Trasgu"" de lliteratura illustrao. Ente estos títulos destaca un nuevu llibru protagonizáu por Nardo y Quina, personaxes creaos pol piloñés Enrique Carballeira, que toles selmanes apaecen en formatu de tira d'humor gráficu en dellos periódicos asturianos. El restu de los títulos que se presenten como novedá son ""La Lluz de la Lluna"", ""¿Pa qué val una Pota?"" y ""¿Pa qué val una bufanda?"", del tamién piloñés, Miguel Rojo Martínez. Estos dos últimos llibros formen parte de la estaya pa primeros llectores que s'abre dientro de la colección. La llista de novedaes complétase con otru llibru d'Enrique Carballeira: ""De recuerdu, un dinosauriu"", que cunta la historia d'un científicu chifláu, Ramón, empeñáu en construyir una máquina pa viaxar nel tiempu, y tamién una historia firmada pola autora de Xixón, Helena Trejo Fombella, baxo'l títulu de ""A la gueta setes na seronda""."