La capiella ardiente d’Álvarez Areces treslládase a Xixón

Tres instaláse na tarde del xueves nel salón Europa de la Xunta Xeneral, onde se desplazaron políticos de tolos collores, personalidaes y ciudadanos, la capiella ardiente de Vicente Álvarez Areces treslládase a Xixón. Va poder visitase hasta les 19 hores.

Una semeya del que fora presidente del país ente 1999 y 2011 presidía’l llugar xunto a la caxa, cubierta coles bandera d’Asturies y España, que llegaba sobre les 14 hores dende’l tanatoriu de Xixón. A los familiares acompañáronlos nel veloriu amigos y políticos, personalidaes procedentes del tol Estáu y decenes de ciudadanos.

Na llarga llista ta’l presidente del Senáu, el popular Pío García-Escudero; Mercedes Fernández, presidenta del PP d’Asturies; el cantante Víctor Manuel; l’ex presidente Pedro de Silva; l’ex alcalde Antonio Masip; y Ignaciu Vidau, presidente del Tribunal Superior de Xusticia d’Asturies (TSXA), ente otros, amás de compañeros de partíu y miembros del Gobiernu actual, col presidente Javier Fernández al frente, asina como representantes de les formaciones con representación parllamentaria. Enantes, en Cabueñes, acudieron a dar el pésame a la sala 8, onde taba la caxa del socialista, los ex presidentes Antonio Trevín y Francisco Álvarez-Cascos; Belarmino Feito, presidente de FADE; y los sos compañeros Adrián Barbón y Adriana Lastra, ente otros, amás de Javier Fernández.

Pasaes les 11 hores, el cadabre d’Álvarez Areces tomó rumbu a Xixón, onde una gran cantidá de persones esperaba pa da-y l’adiós al que fora alcalde de la ciudá ente 1987 y 1999. Nel salón de recepciones de la Casa Conceyu instalóse na capiella ardiente, formándose nes primeros momentos llargues fileres pa visitala, cola bandera del conceyu sobre la caxa xunto a les d’Asturies y España.

El veloriu va tar abiertu hasta les 19 hores. Álvarez Areces será incineráu darréu, anque l’homenaxe a la so persona va siguir hasta’l domingu, yá que la FSA ta organizando un actu de despidida al ex presidente del país na Llaboral.