Les nueches en danza aporten a Uviéu

La plaza Trascorrales va ser la sede de la primer sesión d'esta iniciativa na ciudá.

Depués de cuatro años Uviéu va sumase esti sábadu a esta prestosa folixa al rodiu'l baille y los cantares tradicionales. Dao'l tamañu de la ciudá y les bones comunicaciones con otros puntos del área central, espérase una participación importante, quiciabes la mayor de les dieciséis celebraes hasta la fecha.

L'actividá nel llugar va comenzar a les 19 hores con un taller de baille de baldre destináu a aquelles persones que nun sepan baille asturianu o quieran prauticar de cara a la nueche, del que va encargase Xeitu, con Pau Santirso al frente. Ésti va finar a les 21, una hora enantes del comienzu previstu de la Nueche en Danza.

"Trátase de mostrar la cultura tradicional asturiana, que ye no que trabayamos", esplicó Santirso na presentación de la cita celebrada ayeri na Casa Conceyu. “Nueches como ésta vienen d'una corriente de Centroeuropa de revitalización del baille, que data yá de los 70. Primero llegó a Galicia, Madrid, Catalunya..., y este tipu d'actividaes, viendo l'acoyida neses zones, decidimos echales a andar equí pa divulgar la cultura tradicional como patrimoniu del pueblu asturianu”, añadió Ramses Ilesies.

Na semeya, Ilesies, Santirso y Rubén Rosón, conceyal de Turismu y Economía, na presentación de la Nueche en Danza uvieína.