Tinéu entra na IXP del Vinu de Cangas

"La Conseyería de Mediu Rural y Pesca aprobó l'inxerimientu de nueve parroquies del Conceyu de Tinéu a la Indicación Xeográfica Protexida del Vinu de la Tierra de Cangas. Cúmplese asina la solicitú del Conceyu de Tinéu, presentada yá nel añu 2005 y aprobada polos xestores de la IXP del vinu de Cangas en febreru del 2006.

Arganza, La Barca, Xinestaza, Meriás, El Rodical, Santianes, Santuyanu, Surriba y Tuña, parroquies con tradición de vinu y que xeográficamente atiesten colos conceyos de la IXP amiéstense asina a Ayande, Cangas del Narcea, Degaña, Salime, Ibias, Eilao y Pezós, los seis conceyos que pertenecen a la IXP. Les bodegues de Tinéu que quieran producir vinu van tener que pagar una cuota de 1.500 euros al añu a la IXP los primeros cinco años de funcionamientu, amás de que los productores han cumplir con toles condiciones técniques que manda la IXP.

L'enanchamientu de terrén qu'apurren estes parroquies de Tinéu supón tamién un emburrión pa consiguir la Denominación d'Orixe pal vinu asturianu, qu'entamó la so recuperación dempués d'años decrisis a primeros d'esta década. La producción añal d'esti vinu asítiase alredor de los 90.000 llitros, mientres que la superficie de viña ye de cerca de 70 hectárees."