Conveniu de l'ALLA con La Ponte-Ecomuséu pa potenciar l'usu científicu y cultural del idioma

Esta iniciativa comunitaria, autoxestionada y abierta de Santu Adrianu nació cola fin de promocionar y difundir el patrimoniu arqueolóxicu, históricu y etnográficu.

Xosé Antón González Riaño, presidente de l'Academia de la Llingua Asturiana (ALLA), va desplazase mañana al llar de La Ponte-Ecomoséu pa roblar col so direutor, Jesús Fernández Fernández, un conveniu pol que la institución académica va asesorar llingüísticamente la so actividá y producción científica. "Ye un ecomuséu xestionáu pola población llocal onde se socializa’l patrimoniu cultural, tresmitiendo valores de respetu sobre les comunidades rurales y n’onde l’asturianu va tener dende agora más fuercia", destaca l'ALLA.

El conveniu, solicitáu por La Ponte, afita tamién que dambes entidaes van informase davezu de les sos actividaes, igual d’investigación que de divulgación y formación, y l'intercambiu de les sos publicaciones periódiques. La firma del mesmu ta prevista pa les 13 hores.

Na semaya, portada de 'Cuadiernu', revista de difusión de La Ponte.