'Nun ye comedia. Non ye non' nel Domingu de Sidros y Comedies

José Ramón Oliva firma un añu más la obra d'adultos, qu'esti añu se centra na muyer.

L'Asociación pola Recuperación de los Sidros y Les Comedies ‘El Cencerru’ entama mañana'l Domingu de Sidros y Comedies, celebración que tien llugar en Valdesoto'l domingu siguiente a Reis. Los Sidros van llamar un añu más a los vecinos a acudir al campu la Ilesia depués de misa, al rodiu les 13 hores, pa presenciar les dos comedies que se represente esti añu.

La primera va ser 'Paziencia', de Pergentino Martínez, a cargu de los Escolinos de Faes. Darréu va ser el turnu de los adultos, que van a poner n'escena 'Nun ye comedia. Non ye non', d'Oliva, que va tratar sobre la violencia de xéneru y les dificultaes qu'atopa la muyer nel so día a día tanto nel ambiente domésticu como llaboral, amás de tocar otros asuntos d'actualidá.