La Coordinadora Ecoloxista denuncia que nel 2006 l’aire de Xixón perdió calidá

"Colos datos oficiales apurríos pol Gobiernu asturianu correspondientes al añu 2006, Xixón ye la única ciudá asturiana onde en toles estaciones de medición aumentaron los niveles de contaminación del aire respective al 2005. L'análisis que fai de los datos la Coordinadora Ecoloxista asturiana concluye que la calidá del aire foi ""mui mala"" el 44% de los díes del añu na Villa de Xovellanos.

D'esta miente, no tocante a partícules en suspensión nel aire, causantes de males respiratorios, los sos niveles de protección a la salú perpasáronse en 156 díes del añu, cuando'l tope consentíu ta en 35 vegaes al añu. Entovia más, mientres el valor mediu que se considera tope de protección de la salú ta nes 40ug/m3, la media de Xixón foi de 51 ug/m3, llegándose a una ocasión en que la concentración algamó les 487 ug/m3.

L'óxidu de nitróxenu, un contaminante qu'afecta a la salú de les plantes, cuasimente triplicó con 86 ug/m3 tol añu'l tope añal de protección a la vexetación que ye de 30 ug/m3 . Nos humanos, esti axente enrita'l sistema respiratoriu, agravando toles enfermedaes que lu dañen.

Otros dos contaminantes, el dióxidu d'azufre (SO2) y l'ozonu, que tamién ataquen el sistema respiratoriu, nun pasaron de los valores tope, anque raspiaron con ellos. Too ello lleva a la Coordinadora a denunciar que l'Ayuntamientu de Xixón ""mintió"" cuando declaró'l pasáu 4 d'avientu que'l 90% de los díes en Xixón la calidá del aire yera bona, una valoración que desmienten los datos de les 4 estaciones de medición del conceyu. Por ello, el grupu fai un llamáu a l'alcaldía pa qu'igüe los problemes que vienen d'una industria a la que se-y consiente trabayar en precario y d'un tráficu escesivu.

La Coordinadora tamién llama l'atención sobre'l fechu de que Xixón yá tien una tasa mui alta d'enfermos respiratorios, cardiovasculares y tumorales, una situación que diz que pue agravase colos proyectos de centrales térmiques nueves y regasificadora previstos pa la ciudá."