Abiertu'l plazu p'apuntase a la boda vaqueira d'Aristébanu

"L'Asociación d'Amigos del Festival Vaqueiru, que tolos años organiza'l ""Festival Vaqueiru y de la Vaqueirada"" que se celebra n'Aristébanu cada branu, tien abiertu'l plazu pa la inscripción de pareyes que quieran protagonizar la tradicional ""boda vaqueira"" celebración na qu'una pareya escoyida pola organización escenifica'l casamientu tradicional ente los miembros d'esti grupu de ganaderos treshumantes. Dempués de la polémica del 2006, en que la organización decidió nun almitir pareyes homosexuales, con tar yá llegalizáu esti matrimoniu, la convocatoria 2007 caltién les mesmes condiciones y alvierte que namás van almitise pareyes herterosexuales.

La presidenta de l'Asociación, Carmen Martínez declaró que la cuestión de les pareyes de persones del mesmu sexu na boda vaqueira ta ""aparcada"" y que nun ""quería entrar na polémica"" ello dempués de que nel 2006 xustificare esta posición como una midida pa ""conservar la tradición"" en cuantes que nel tiempu en que se recrea la boda vaqueira yera ""impensable"" un matrimoniu ente dos homes o dos muyeres. La negativa a almitir pareyes homosexuales mancó en Xega, principal asociación asturiana de defensa de los derechos del colectivu homosexual, que calificó la decisión de l'asociación de ""muestra d'homofobia xustificada pol al respetu a la tradición"".

Dende 1965, el festival vaqueiru remocica la tradición del grupu social vaqueiru. El ritu central del día ye la tradicional boda vaqueira, pol que tolos años se casa una pareya na Braña d'Aristébanu, en conceyu Valdés. El ritual entama col cortexu de los novios, padrinos y convidaos, que van camín del llugar de la ceremonia tres d'un carru del país tiráu por gües, nel que va l'axuar, qu'incluye amás de la ropa, sacos con alimentos y la mesma cama del matrimoniu. N'acabando la ceremonia faise la típica xinta vaqueira con xamón cocío, choscu, empanada, bollos preñaos, frixuelos, postres de ñata y café."