Buendía diz qu’IX "saca los pies del tiestu" coles sos declaraciones sobre l’embalse de Caliao

"El conseyeru de Mediu Ambiente, Infraestructures y Ordenación del Territoriu, el socialista Francisco González Buendía, siguió cola polémica entamada colos sos socios de gobiernu d'Izquierda Xunida a cuenta del embalse de Caliao (Casu) y acusó al representante d'IX Jesús Iglesias de sacar los pies del tiestu coles sos declaraciones en que refugaba la construcción del banzáu, lo mesmo fuere acordies col proyectu orixinal que nuna versión menguada del mesmu, como ofreciere Buendía.

El conseyeru precisó qu'hai un estudiu d'impactu tramitándose por parte de la sociedá Acunor, de titularidá del Ministeriu de Mediu Ambiente, qu'espeya posibles alternatives, como ye'l primer pasu obligatoriu dientro d'un estudiu d'impactu ambiental. Buendía aseguró que, no tocante a la cuestión de Caliao, el procedimientu ta mandándose polos calces llegales apautaos y pidió-y a Iglesias que lo corroborare colos sos compañeros conseyeros en gobiernu, alvirtiendo que nun ye tiempu d'opinar hasta que l'estudiu que ta faciéndose pase a información pública."