Greenpeace píde-y al Gobiernu asturianu que nun solicite más derechos d'emisiones contaminantes

"El responsable d'Enerxía de la organización ecoloxista Greenpeace, José Luis García, declaró ayeri que-y abultaba ""inxustificable"" que dende Asturies se reclamaren más derechos de emisión de CO2, independientemente de los ""intereses"" de les empreses que producen corriente n'Asturies. El representante de Greenpeace pìdió-y al Gobiernu asturianu ""responsabilidá"" énte el cambéu climáticu y el calentamientu del planeta.

Énte la solicitú por parte de les empreses eléctriques propietaries de centrales térmiques de carbón y siderúrxiques asturianes de más derechos d'emisión que'l xefe del executivu Álvarez Areces dixo que diba defender, García reconoció que les empreses tán nel so ""derechu de pidir"" y dixo que-y abultaba que yá se-yos dieron más derechos d'emisión ""de lo que se debería"". Pal representante de Greenpeace, el llabor del Gobiernu ye'l d'atender los ""intereses xenerales de los asturianos"", que nun concueyen col interés de les empreses ""por mui poderoses que sían económicamente"".

Pa Greenpeace, el modelu de producción enerxéticu qu'existe n'Asturies ye ""incompatible dafechu"" coles alternatives al cambéu climáticu. ""Quemar carbón ye la principal fonte d'emisión de CO2"" pa José Luis García, que sorrayó que'l cambéu climáticu afecta yá a Asturies y qu'inda va afectala más, pidiéndo-y a l'alministración asturiana qu'apurra a la población los datos del calecimientu global, al qu'Asturies ""contribuye coles sos importantes emisiones"". El responsable de la organización de conservación del mediu ambiente pidió la ""reducción"" d'estes centrales y, contra l'argumentu de la creación de puestos de trabayu col que suel defendese la creación de centrales nueves, recordó que les enerxies renovables ""tamién dan puestos de trabayu"".

Nos sos últimos estudios, Greenpeace llamaba l'atención sobre los altos índices de contaminación de la industria asturiana. Según Greenpeace, nel añu 2005, les térmiques asturianes emitieron un total de 18.518.834 tonelaes de CO2, lo que significa un 10% de les emisiones contaminantes de tol estáu español.

Énte los datos de temperatures del pasáu 2005 y la realidá d'un de los inviernos más calientes de la historia recién, García esplicó que, anque espeyen el calentamientu y confirmen una tendencia evidente a llargu plazu, nun dexen de ser datos aisllaos."