La figura d'Andrés Solar, nel recuerdu

Andecha Astur entama en Deva un añu más un homenaxe al escritor coincidiendo col aniversariu de la so muerte.

Ayeri, 27 d'avientu, cumpliéronse 34 años de la muerte n'accidente de tráficu d'Andrés Solar, ún de los meyores escritores en llingua asturiana a pesar de dexanos cuando tenía namái 29 años. Como ye vezu, esta organización política entama un actu na so memoria frente a la placa n'alcordanza que colocó nel cementeriu xixonés nel 2004, que va comenzar a les 13 hores de mañana cola presencia de la familia del autor.

Nel mesmu reivindicaráse "la dimensión nacionaliega d’Andrés Solar Santurio, escritor de merecíu y reconocíu prestixu nel ámbitu lliterariu asturianu del que por embargu suel tapecese’l so fondu compromisu políticu que lu llevó a ser miembru fundador del Ensame Nacionalista Astur, presentándose por esi partíu como candidatu a la Xunta Xeneral". Del de Deva destaquen la so "implicación, capacidá de trabayu y cualidaes personales", recordando que foi "compañeru de militancia de munchos collacios d'Andecha Astur, y una referencia obligada pal conxuntu del nacionalismu asturianu".