Jesús Iglesias nun quier embalse en Caliao "nin grande nin pequeñu"

"El Grupu Parlamentariu IX-BA esixó-y a la Conseyería de Mediu Ambiente que dexe les ""ocurrencies"" no tocante al ordenamientu hidrolóxicu d'Asturies, en referncia a les declaraciones del Conseyeru de Mediu Ambiente y Ordenación del Territoriu Francisco González Buendía sobre la posibilidá d'una mengua nel tamañu del embalse previstu en Caliao (Casu) al que s'opón IX-BA ente otros partíos y colectivos.

D'esta miente, la portavoz parlamentaria d'IX-BA, Noemí Martín, declaró que la ufierta del conseyeru namás pue esplicase como una ""ocurrencia"" en cuantes que'l Gobiernu ""nun dispón de datos que demuestren la necesidá d'un embalse en Parque Natural de Redes como única alternativa pal abastecimientu d'agua nel centru d'Asturies"". La portavoz d'IX-BA pidió que, ""pola propia imaxe del gobiernu"", se ponga ""puntu y final"" a una ""defensa errática"" d'una infraestructura que ""nun se demostró que fuere imprescindible"" y pidió-y a Mediu Ambiente que s'esfuerce en ""preparar la planificación hidrolóxica nueva que manda tener la Unión Europea"" una planificación que pa la diputada d'izquierda ha encontase na ""cultura nueva del agua, que da por superada la prioridá de les grandes infraestructures hidráuliques, y que parte d'atender la xestión de la demanda al traviés de midíes d'aforru na utilización del recursu, dalgo que refuga'l Conseyeru Buendía"".

El coordinador d'Izquierda Xunida Jesús Iglesias tamién se declaró contrariu a la contrucción del banzáu de Caliao ""anque sía pequeñu y anque s'amieste col usu d'agua subterráneo"". El líder d'IX esplicó que nun se pue construir un embalse nun espaciu protexíu pol ""coste mediuambiental"" y pidió que l'agua asturiano s'emplegare preferentemente pal consumu humanu y menos p'aplicaciones hidroeléctriques, amestando que ""ye preciso buscar una manera d'apurrir a la industria agua de menos calidá ensin falta de gastar lo potable""."