Escenines pa la Reciella cumple cola so cita navidiega coles neñes y neños asturianos

El VI Festival Escenines pa la Reciella programa cuatro actividaes pa esta Navidá. Dende’l miércoles hasta’l sábadu, el xixonés Centru de Cultura Antiguu Institutu va acoyer teatru, títeres, conciertos y cuentacuentos en llingua asturiana.

‘Reciella. Families pol Asturianu’ entama un añu más el ciclu d'artes escéniques n'asturianu pa neños y neñes en collaboración cola Fundación Municipal de Cultura, Educación y Universidá Popular. Una iniciativa que ye un ésitu de públicu, como amuesa’l fechu de que l’añu pasáu se completara l’aforu en toles actividaes.

El miércoles Olga Cuervo va encargase d’abrir la sesta edición del festival con ‘Cuentos a la lluz d’un candil’, pa siguir el xueves col espectáculu de títeres ‘Azul y la revolución de los colores’, a cargu de Mar Rojo Teatro. Tamién va haber teatru’l vienres, cola obra ‘El principín’, d’Higiénico Papel.

Va encargase de zarrar esti Escenines pa la Reciella el conciertu ‘Cantares navidiegos pa neños y neñes’, nes qu’una bandina formada por dalgunos de los nuestros meyores músicos tradicionales van poner nel escenariu una recopilación de temes navidiegos, tanto los que correspuenden al cancioneru tradicional como los nuevos compuestos a propósitu de los personaxes de L’Anguleru o’l Nataliegu. Les cuatro actividaes van tener entrada llibre y van comenzar a les 19 hores.