García Granda desea que l’asturianu “se pueda deprender y usar con normalidá, como cualquier otru idioma del mundu”

El rector de la Universidá d’Uviéu, Santiago García Granda, recibió’l vienres en Xixón el Pegollu de los XXXIV Premios Andrés Solar qu'entama la XDLA. “Nun creo que faiga nada estraordinario”, afirmó depués de desear que l’asturianu “se pueda deprender y usar con normalidá, como cualquier otru idioma del mundu, porque ye la manifestación d’una cultura que ye la nuestra”.

Con Lali Solar, hermana d’Andrés el de Deva, y el so maríu Jesús, na primer filera, como ye vezu, el periodista Naciu Varilla encargóse un añu más de conducir la gala d’entrega de los gallardones que recuerden al escritor y militante de la Xunta pola Defensa de la Llingua Asturiana (XDLA), fináu n’accidente de tráficu nel 1984 cuando contaba con 29 años, que pon el nome a los gallardones. Éstos tiene dos estayes, la positiva, el Pegollu, que recompensa a "una entidá o persona que rescamplara pol so llabor en defensa o promoción del asturianu", y el Madreñazu, l’antipremiu.

El primeru foi pa García Granda "pol llabor que vien llevando alantre na normalización del asturianu na máxima institución educativa, investigadora y científica d’Asturies", mentes que’l segundu foi “pal discursu del odiu y negacionista xenófobu de Pablo Casado, cabezaleru de la organización política PP, que nos últimos tiempos vien faciendo declaraciones desinformaes y malintencionaes sobre l'asturianu". El rector acudió a recoyer el so gallardón, mentes que’l presidente del PP nin nengún representante del so partíu n’Asturies pasó pel Centru de Cultura Antiguu Institutu a pol Madreñazu, polo que la XDLA va proceder, como ye norma nestos casos, a unvialu al merecedor del premiu de los Andrés Solar que va pa “la persona o entidá que rescamplara pol so llabor negativu pa cola llingua asturiana”.

El rector recoyó de les manes de Lali’l Pegollu, pa darréu dar un pequeñu discursu que comenzó destacando que consideraba que’l premiu yera “inmerecíu” pol fechu de qu’él nun fixera “nada estraordinario”, namái’l so trabayu. Asina, “como científicu” reclamó que l’asturianu “se conoza, se divulgue”, deseando que “se pueda deprender y usar con normalidá, como cualquier otru idioma del mundu, porque ye la manifestación d’una cultura que ye la nuestra. Una historia, que ye la d’Asturies; que ye la identidá, l’asturiana, y que, en suma, da sentíu a lo que somos y a lo que podemos aportar al mundu”.

El caderalgu de Química Física destacó que-y “presta muncho y emocióname recibir un premiu que lleva’l nome d’Andrés Solar, una persona con una sensibilidá especial y que llamentablemente morrió mui prematuramente, pero que dexó impresa una lleición d’honestidá y amor a la tierra que deberíemos siguir toos”. Depués d’asegurar que lo que fai dende’l Rectoráu “ye dar normalidá y naturalidá a lo que dafechu ye normal y natural”, comprometióse a “siguir intentando ameyorar; facer lo meyor que se pue facer por un idioma, que ye usalu en toles estayes de la vida, pero fundamentalmente usalu pa dialogar, pa conocer a les otres persones, pa comprendeles y p’aceptales, que ye la única forma de quereles; o de quereles bien”.

"Ye'l tiempu del llabor y el compromisu"

Depués de la llectura de les actes y entrega del Pegollu, tomó la pallabra Carlos Pulgar, voceru nacional de la XDLA, pa facer el tradicional repasu al añu nel que’l ‘Proyecto 2018 pola Oficialidá’ llevó, de la mano de Podemos y Izquierda Xunida (IX), la reforma del Estatutu d’Autonomía a la Xunta Xeneral, onde foi frenada pola posición de la FSA d’esperar a la próxima llexislatura pa entamar esti procesu. “Desgraciadamente, esti proyectu paróse na Xunta Xeneral ensin dexar que siguiera alantre la so tramitación, pero quedó demostrao la fuercia movilizadora y la capacidá propositiva del movimientu de reivindicación llingüística nunos tiempos, como viemos hai poco, de muncha volatilidá política que nos reafirmen nel trabayu p'aprovechar toles posibilidaes que tean al nuestru algame”, afirmó.

Poro, quixo “facer un llamáu a tola militancia a redoblar esfuerzos y a permanecer activos y atentos na defensa de los nuestros derechos y les nuestres reivindicaciones. Nun ye’l momentu de mieos y repunancies, ye’l tiempu del llabor y el compromisu. Ye’l tiempu d’afirmar que la oficialidá ye la ferramienta necesaria p'asegurar los derechos d’una parte importante de la ciudadanía asturiana y de salvaguardar el nuestru idioma pal futuru”. Enantes, Pulgar repasó los motivos que llevó a entregar el Pegollu y el Madreñazu de los Andrés Solar, criticando nun primer momentu “los discursos de la inorancia bien representaos na madreña purpurina d’anguaño”, que llevó’l popular Casado, “son ciertamente eso, inorancia, pero, amás, escuenden tres d'ellos lo que ye de verdá esmolecedor: una visión escluyente, intolerante, totalitaria, discriminatoria y, polo tanto, probetaya, de la realidá. D’imponese esta visión y esti dircursu, el futuru qu’espera a la razón va ser dramáticu; el porvenir pa les causes xustes y pa los derechos va ser abegosu”.

“Pero tamién en toles dómines”, siguió’l voceru, “hai persones, grupos y instituciones que s’oponen al escurantismu, la inoracia y la manipulación. Que faen una defensa valiente de los valores democráticos, de los derechos fundamentales, y que lluchen por un futuru xustu y de reconocimientu. A esti grupu pertenecen les persones que reciben el Pegollu de los Premios Andrés Solar”, como ye esti añu García Granda, que “cola so implicación activa nel usu del asturianu, dignifica la presencia del idioma nuna institución qu’arrecostina con 400 años años d’historia. Empata, amás, cola meyor tradición de la nuestra universidá, cuando los Aramburu, Canella o Sela trataben la cultura asturiana col procuru que merez y, al mesmu tiempu, asitiaron la institución en puestos d’altu prestixu”.

“Agora esti nuevu impulsu ye fundamental p’asentar el futuru de la universidá y de la sociedá asturiana. Un impulsu que nun dea'l llombu al so patrimoniu llingüísticu nin a la cultura asturiana, sinón que lo garre de base pa proyectar lo que somos y queremos ser al mundu”, apuntó darréu.

Actuación d’Antón Menchaca

La gala, a la qu’acudió, ente otres munches persones, Borja Llorente, secretariu xeneral de la Federación d’Enseñanza d’Asturies de Comisiones Obreres (CC OO); Mario Suárez del Fueyo, voceru municipal de Xixón Sí Puede; y Mariluz Pontón, secretaria d’Educación, Universidaes y Normalización Llingüística de la FSA, finó con una actuación a cargu del dúu Antón Menchaca, qu’interpretó conocíes asturianaes, como ‘Al pasar pol puertu’ o ‘Per debaxo del puente’, renovaes según la so propuesta musical. Darréu, la mayor parte de los asistentes xubió a la segunda planta del centru cultural pa disfrutar d’un pinchéu de xermandía.