ETA diz que sigue la tregua y asume l'atentáu de Madrid

"ETA faló por primer vegada dempués del atentáu del 30 d'avientu na terminal T-4 del aeropuertu de Madrid. Al traviés d'un comunicáu asoleyáu en diariu vascu Gara, ETA da anuncia de que reconoz l'autoría de la bomba qu'españó na terminal T-4 del Aeropuertu de Barajas al empar que manifiesta que ""la tregua nun ta rota"" por ello y fai responsable al Gobiernu d'España por nun apurrir les ""condiciones que se precisen pal procesu"". Sicasí, ETA diz que tien ""voluntá de reforzar y impulsar el procesu de paz"". Sobre l'atentáu, nel que morrieron dos persones, ETA afirma que ""nun tenía intención de causar víctimes"" y que por eso alvirtió ""con tiempu pa vaciar les instalaciones"". L'anuncia d'ETA apaez al día dempués de que Batasuna-y reclamare que ""cumpliere los compromisos de la declaración d'altu'l fueu"".

D'otra manera, el Presidente del Gobiernu José Luis Rodríguez Zapatero va comparecer énte'l Congresu'l próximu llunes a les cuatro de la tarde pa informar sobre la política antiterrorista del Estáu. Pela so parte, el ministru d'Interior Alfredo Pérez Rubalcaba afirma güei nuna entrevista pal periódicu norteamericanu New York Times que ""yá nun va haber una tregua creíble con ETA""."