Navidá, tiempu de tradiciones

Aporta’l Nadal a Asturies, un tiempu de xuntanza, tradiciones recuperaes y aguilandos. L’Anguleru yá ta camín d’Asturies, el golor a casadiella toma les nueses cocines y el país prepárase pa dos selmanes de fiesta con munches actividaes.

Ente’l 25 d’avientu y el 6 de xineru celébrase la Navidá, periodu que realmente comienza a celebrase muncho enantes na sociedá moderna. La nueche del 24 al 25 ye la Nuechebona, na que na tradición asturiana predominaba la carne y los dulces típicos d'esta época, como les casadielles o bollines.

Tamién en Nadal entamábanse tradiciones típiques d'esti tiempu, la mayoría yá desaniciaes. Ente les que tán agora recuperándose destaca'l Nataliegu, un tueru que se quema en Nuechebona, o'l ramu, sobre manera en Lleón, una decoración típica d'estes feches.

Nesta época ye cuando comiencen a celebrase les mazcaraes d'iviernu o aguilandeiros. Tres la salida de los Aguilandeiros de San Xuan de Villapañada, programa pa esti domingu, van continuar Os Reises del Valledor (29 d'avientu), El Guirria (1 de xineru), Os Reises de Tormaleo (5 de xineru) y el 'Domingu de Sidros y Comedies' (13 de xineru).

Los pequeños de la casa tamién va poder disfrutar d'actividaes en llingua asturiana nesti tiempu gracies al festival 'Escenines pa la Reciella' en Xixón. Comienza'l miércoles 26 colos ‘Cuentos a la lluz d’un candil’ d’Olga Cuervo, y va siguir el día siguiente con ‘Azul y la revolución de los colores’, de Mar Rojo Teatro.

El vienres el turnu va ser pa la obra ‘El principín’, d’Higiénico Papel, y el sábadu con un conciertu de cantares navidiegos pa neños y neñes a cargu d’una bandina de músicos asturianos. Toles actividaes van celebrase a a les 19 hores nel salón d'actos del Centru de Cultura Antiguu Institutu, con entrada llibre hasta completar aforu.

L'Anguleru

La llegada de L'Anguleru, qu'aporta a Asturies tolos 24 d'avientu procedente del mar de los Sargazos per L'Arena, ye ún de los momentos más esperaos del Nadal, sobre manera pa la reciella. Esti añu esti personaxe navidiegu que reparte regalos tien previsto llegar a les 18 hores pa participar darréu nuna cabalgata pela población.

Sicasí, va dexase ver enantes n’Avilés y en Xixón. Mañana va tar presente nel II Cortexu del Nataliegu que va partir de l’avilesina plaza Domingo Álvarez Acebal a les 12.45 hores.

El pasucais con L’Anguleru y Lolina la rulera va abrilu un tríu de gaita, tambor y bombu na cabecera, a los que van siguir un grupu de neñes y neños vistíos de pescadores. Los llendadores van carretar el nataliegu, tueru máxicu de Navidá, pa que dea proteición y felicidá a toles persones del conceyu, pa zarrar la comitiva con un grupu de pandereteres.

A la llegada a la Casa la Culura, los presentes van poder entrugar y falar con L’Anguleru y Lolina, asina como entrega-yos les sos cartes. Amás van recibir como regalu castañes de chicolate.

En Xixón la cita col pescador d’angula que lleva regalos a toles neñes y neños va ser el llunes, a les 12.30 hores, nel Acuariu. Na cita tamién podrán entregar les sos cartes a L’Anguleru.

Especial Navidá 2018

En 'A la gueta los sueños' ufrimos l'especial Navidá 2018, con información sobre esta celebración y los aspeutos más importantes d'ella.