El Marino ganó nel derbi asturianu de segunda B

El Marino de Lluanco venció nel derbi asturianu de segunda B que se disputó ayeri en campu lluanquín de Miramar. El marcador rexistró'l resultáu d'empate a ceros hasta cuasimente l'últimu minutu. Los lluanquinos salieron con más puxu y gana de llograr el resultáu más prestosu del añu pa la so afición, teniendo delles ocasiones pa ello, anque l'Uviéu pudo marcar nel minutu 84, que tuvo la so ocasión más clara nun remate de Nacho García.

Cuando'l partíu paecía que diba finar col 0-0, el Marino forzó un corner que Borja Prieto peinó al primer palu batiendo a Gastón, porteru del Real Uviéu. Los azules confirmaben asina la so cigua colos lluanquinos, a los qu'entovía nun ganaron dende que xubieron a segunda B. El resultáu marcó la suerte de los dos conxuntos, y asina, mientres el Marino garra fuelgu na parte media de la tabla con 26 puntos, l'Uviéu empózase nel puestu de promoción con 19, a trés de la salvación matemática.

El tercer representante asturianu na segunda B, l'Universidá d'Uviéu, sigue en puestu de descensu directu con 18 puntos dempués de perder por 3 goles a cero en campu del Burgos.