El Gobiernu asturianu estudia menguar el tamañu de l'embalse de Caliao

"El conseyeru de Mediu Ambiente Francisco González Buendía, declaró que'l Gobiernu asturianu nun descarta nengún tipu de ""solución"" pal embalse de Caliao, en conceyu Casu, incluyida una posible ""fórmula mista"" amestando un banzáu más pequeñu del previstu de mano col usu d'acuíferos subterráneos. Buendía dixo que tán faciéndose los estudios precisos pa ver que solución ye la más afechisca, anque aclarió que la decisoón sobre l'asuntu nun almite munchu más retrasu.

La propuesta de construyir l'embalse de caliao alcontró la protesta de grupos de conservación del mediu ambiente y tamién el d'Izquierda Xunida - Bloque por Asturies, socia de gobiernu de la FSA-PSOE. Contra les posiciones de los ecoloxistes y opositores al banzáu, que sorrayen qu'esti nun ye necesariu, Buendía declaró qu'Asturies ""tien falta d'agua"" y un sistema d'aprovechamientu d'esti recursu, refugando la tésis ecoloxista de que la xustificación del embalse venga pola mayor presión urbanística y industrial sobre'l recursu.

El conseyeru dexó una puerta abierta tamién a la non construcción de la incineradora de Serín, otru de los proyectos más criticaos del actual executivu pol so coste mediuambiental, comentando la posibilidá de facer un segundu vertederu. Buendía afitó que'l vertederu actual va enllenase d'equí al añu 2015 acordies con toles previsiones oficiales, fecha na que tien d'haber una solución alternativa al mesmu. El conseyeru esplicó que la Xunta Xeneral dio'l mandáu de buscar soluciones pa ""menguar, reutilizar y reciclar"" el volume de residuos primero de tomar una declaración definitiva sobre l'asuntu. Buendía reconoció qu'hai unos parámetros de recicláu determinaos que se manden dende instancies europees y adelantó que ""si nun nun s'opta pola incineradora, habrá que buscar otres alternatives, ente elles la d'escoyer un sgundu vertederu""."