L'árbitru condenó al Sporting en Murcia

"El Sporting entamó l'añu 2007 con una derrota en Murcia marcada pola malísima actuación del árbitru y pola cigua que persiguió a los furbolistes de Manolo Preciado, qu'espetaron dos balones nos postes.

L'equipu asturianu saltó al campu con tolo meyor de la so plantiya, y el so arranque recibió premiu nel minutu 11, adelantando Barral al Sporting a pase de Juanmi nel primer tiru a puerta que facía. Poco duró l'alegría, porque'l Ciudad de Murcia empató nuna xugada filvanada ente Luque y el nórdicu Goitom, que remató de cabeza al fondu de la portería. Barral pudo marcar el 1-2 pal Sporting nun balón rasu, pero l'arrebatedor local paró en dos tiempos el tiru del delanteru del Sporting, mientres que Jorge mandó un balón a la madera. Mientres el xuegu avanzaba, los asturianos víen como l'árbitru diba cargando de tarxetes al Sporting y perdonándo-yos toles sos acciones de peligru a los murcianos, un favoritismu que llegó a ser por de más nel segundu tiempu. Nesta sgunda parte, nin l'árbitru nin l'asistente quixeron validar un gol pantasma de Barral, mientres qu'un discutidísimu penalti por agarrón de Sastre a Gibanel convertióse nel 2-1 pal Ciudad de Murcia, que llogró'l 3-1 nuna falta por xuegu peligrosu que tamién protestaron los asturianos y especialmente Roberto, porteru del Sporting, que pidió l'anulación del saque de la falta y del tantu porque nin siquiera-y diere tiempu a colocase na portería cuando l'árbitru pitó'l saque del castigu. El Sporting nun se dio nin col 3-1, y Preciado dio-y entrada a Omar, mui revolvín y qu'espetó otru balón na madera. Nun hebo tiempu pa más nun partíu engafentáu poles decisiones arbitrales y pol choque del delanteru Edwin Congo col porteru del Ciudad de Murcia, al que-y rompió dos deos d'una mano. Los futbolistes del Sporting denunciaron insultos racistes al futbolista colombianu dempués d'esta acción.

L'entrenador del Sporting de Xixón, Manuel Preciado, condenó l'actuación del árbitru Hevia Obras y llamentó, de manera xeneral, que'l Sporting, con ser l'equipu más atacante de la categoría, entovía nun se-y pitare un penalti a favor en tolo que va de lliga."