"La oficialidá va xenerar riqueza dinamizando la industria y la economía"

Inaciu Galán, presidente d'Iniciativa pol Asturianu, punxo un conferencia nel Manglar.

'¿Por qué ye necesaria la oficialidá del asturianu? Drechos llingüísticos n'Asturies' yera'l nome de la intervención, que tuvo presentada por Víctor Suárez, cofundador d’Iniciativa pol Asturianu y activista en favor de los derechos llingüísticos. En primer llugar proyeutóse'l documental ‘La vida ensin oficialidá: les consecuencies de la falta de drechos llingüísticos n’Asturies’, que sirvió pa que Galán recordara'l casu últimu de discriminación que se vivió recién n'Asturies.

"Esta mesma selmana denunciamos un nuevu casu qu’afecta a la Conseyería de Servicios Sociales pola publicación d’un documentu nel que s’esixía nun usar otra llingua que nun fuera el castellán. Esto nun puede siguir asina. Y esta situación nun va cambiar mientres los drechos llingüísticos nun tean recoyíos. La oficialidá ye la solución a esti tipu de discriminaciones” apuntó.

Na so intervención, el periodista afirmó que “los defensores del idioma y la oficialidá, que somos la mayoría de la sociedá, queremos que los nuesos drechos tean reconocíos nun estatus d’igualdá colos falantes de castellán. Los asturfalantes nun vamos contra nadie, cada día tenemos más sofitos, xenerando más consensu social que cada día va medrando al rodiu del nuesu patrimoniu llingüísticu”.

Por último, nun dexó pasar que "la oficialidá ye la ferramienta llegal pa igualar los drechos llingüísticos de los y les asturianes. Amás va ser una manera que mos va sirvir pa mantener vivu el patrimoniu llingüísticu d’Asturies. Y tamién porque va xenerar riqueza dinamizando la industria y la economía”.