El Defensor del Pueblu almite a trámite'l recursu contra'l derribu de la Térmica d'Avilés

"La Plataforma Cívica ""Salvemos la Térmica"" que defende la reconversión pa usos culturales de l'antigua central térmica d'Ensidesa - Avilés recibió ayeri una bona noticia, la de l'almisión a trámite y entamu d'estudiu por parte del Defensor delPueblu del recursu que punxere la plataforma énte esta figura solicitando qu'aparare'l derribu del históricu edificiu de la década de los 50 y denunciando irregularidaes nel procesu de demolición. L'anuncia del departamentu que preside Fernando Múgica llega al mesmu tiempu que la empresa encargada de la demolición de la térmica entamaba los trabayos de derribu.

La plataforma espunxere énte'l Defensor del Pueblu un estiyu documental en qu'esplicaba la historia y valor patromonial de l'antigua central térmica de los años 50 y nel que rescamplaba la contradicción de los cargos políticos y autoridaes del conceyu y del Gobiernu asturianu de coalición PSOE - IX/BA, que taben nel añu 2003 d'alcuerdu na conservación de la térmica, contando incluso cola cesión del edificiu por parte de la sociedá Infoinvest pa usos culturales y llegando a encargar en setiembre del 2004 la Conseyería de Cultura un proyectu de ""Plan director del Centru Integral pa la Cultura y l'Ociu"" pa la Central Térmica. La intención primero de la empresa Isolux pa ocupar el sitiu con una central de ciclu combináu nueva, que fracasó, y l'apaición dempués del proyectu de Centru Cultural Niemeyer pa la Ría d'Avilés llevaron a les autoridaes a perder interés pola térmica, retirándo-y cultura toa protección oficial al edificiu en mayu del 2006 al sacala del Inventariu del Patrimoniu Cultural.

Abríase asina la puerta a un derribu que se tramitó con priesa, resolviendo l'espediente'l conceyu en diez díes de plazu. Los llabores de demolición yá tán entamaos y la empresa alxudicataria cuenta con rematalos la selmana qu'entra. Pela so parte, la plataforma de defensa de la térmica diz que van siguir intentando aparar el derribu hasta l'últimu momentu ""removiendo tolos resquicios alministrativos y llegales que se dean""."